ا.نۇپباي مەن ا.ارىستانبەكوۆا 18 جاسقا دەيىنگىلەر اراسىندا ەلىمىزدەگى ەڭ تابىستى جۇپ بولىپ سانالادى.
بۇل تۋرالى قازاقستان تەننيس فەدەراسياسىنان ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
قازاقستاندىقتار اييا نۇپباي مەن اسىلجان ارىستانبەكوۆا ءۇندىستان استاناسى دەليدە وتكەن ەكىنشى ساناتتاعى J200 DELHI جارىسىنىڭ جەڭىمپازى اتاندى.
ولار فينالدا تايلىق دۋەتتى 6:3، 6:2 ەسەبىمەن تىزە بۇكتىردى.
وتكەن جىلى قازاقستاندىق جۇپ ITF Juniors سەرياسىندا جەتى تۋرنيردە ۇزدىك شىققان بولاتىن. بارلىعى ولار وسىمەن 10 تيتۋلعا قول جەتكىزدى.
«جىل باسىندا جەڭىسكە جەتكەن ماڭىزدى. قازىرگى دەڭگەيىمە ريزامىن، بۇدان كەيىن دە بابىمدا بولامىن دەپ ويلايمىن. اسىلجانعا راحمەت، دودادا قيىن ماچتار بولدى. ءبىز سودان ساتىمەن شىعا بىلدىك»، - دەدى ا.نۇپباي.
«بۇل - اييا ەكەۋمىزدىڭ ونىنشى تيتۋلىمىز. جاڭا ماۋسىم باسىنداعى تابىس تىڭ جەتىستىكتەرگە جەتەلەيدى، كۇش بەرەدى. فەدەراسيا مەن Team Kazakhstan اكادەمياسىنىڭ بارلىق باپكەرلەرىنە العىس ايتامىز»، - دەدى ا.ارىستانبەكوۆا.