III Nobel Fest شاراسىن مەملەكەتتىك ەمەس ۇيىمدار ۇيىمداستىرىپ وتىر
ەلىمىزدە ءعىلىمي-بىلىم بەرۋ الەۋەتىن دامىتۋ ماقساتىندا III Nobel Fest شاراسى ونلاين فورماتتا وتەدى، دەپ حابارلايدى Almaty-akshamy.kz Egemen.kz-كە سىلتەمە جاساپ.
Nobel Fest - جىلىنا ەكى رەت وتكىزىلەتىن ەۋرازيا قۇرلىعىنداعى ەڭ اۋقىمدى جانە بەدەلدى ءىس-شارالارىنىڭ ءبىرى. ونىڭ اياسىندا نوبەل سىيلىعى لاۋرەاتتارىنىڭ دارىستەرى وتەدى. شارانىڭ نەگىزگى ماقساتى – ق ر، ورتالىق ازيا، كاۆكاز مەملەكەتتەرىندەگى ءتۇرلى سالادا جۇمىس ىستەيتىن ازاماتتارعا الەمدەگى ەڭ مىقتى نوبەل سىيلىعى يەگەرلەرىمەن، بەلگىلى عالىمدارمەن، بيزنەس سالاسىنداعى تانىمال ادامدارمەن جۇمىس ىستەۋگە مۇمكىندىك بەرۋ. بۇل تۋرالى ورتالىق كوممۋنيكاسيالار قىزمەتىندە وتكەن بريفينگتە G-Global حالىقارالىق حاتشىلىعىنىڭ باسشىسى سەرىك نوگەربەكوۆ ءمالىم ەتتى.
ونىڭ ايتۋىنشا، قازىرگى زامانداعى ەڭ باستى ماسەلە – ادامي كاپيتال. ون جىل بۇرىن الەمدەگى ەڭ قىمبات كومپانيالار شيكىزات پەن قارجى سالاسىنداعى كومپانيالار بولسا، بۇگىندە ەڭ ۇزدىك 10 كومپانيانىڭ 8ء-ى ادامي كاپيتالدى كەڭىنەن پايدالاناتىن تەحنولوگيالىق يننوۆاسيالىق كومپانيا بولىپ تابىلادى.
«مىسالى، بۇرىن عالىمدار نەگىزىنەن ءبىلىم جانە عىلىم سالاسىندا جۇمىس ىستەسە، ءقازىر كومپانيالار جانىنان ۇلكەن عىلىمي ينستيتۋتتار قىزمەت ەتەدى. ولار عالىمداردىڭ ادامي كاپيتالداردى كەڭىنەن پايدالانۋىنىڭ ارقاسىندا ۇلكەن جەتىستىكتەرگە، پروگرەسكە قول جەتكىزىپ وتىر. دامىعان ەلدەردە جاستار، ستۋدەنتتەر، ۇستازدار مەن نوبەل سىيلىعىنىڭ لاۋرەاتتارى، ۇلكەن عالىمدار اراسىندا كەزدەسۋلەر وتكىزىلەدى. وكىنىشكە قاراي، دامۋشى ەلدەردە ونداي كەزدەسۋلەر از. III Nobel Fest شاراسىن مەملەكەتتىك ەمەس ۇيىمدار ۇيىمداستىرىپ وتىر. ءۇشىنشى نوبەل فەستيۆالىنىڭ ايىرماشىلىعى – ونى جالعىز قازاقستاندا عانا ەمەس، وزبەكستاندا، ازەربايجاندا وتكىزىپ جاتىرمىز. بولاشاقتا شارانى ودان ءارى دامىتۋ جوسپارلانعان. ارىپتەستەرىمنەن فەستيۆالدى كەڭىنەن ناسيحاتتاۋلارىن سۇرايمىن. سەبەبى ادامدار نەعۇرلىم كوپ قاتىسسا، سوعۇرلىم ءتيىمدى بولادى»، دەدى س.نوگەربەكوۆ.
G-Global حالىقارالىق حاتشىلىعىنىڭ باسشىسى فەستيۆالدىڭ تەگىن وتكىزىلەتىنىن اتاپ ءوتتى. قاتىسۋشىلار دارىسكەرلەرگە سۇراق قويا الادى، سونداي-اق، ءبىلىم الادى.