ءبىلىم ساپاسى بويىنشا قالا مەن اۋىل اراسىنداعى الشاقتىقتى ازايتۋ شارالارى قولعا الىنادى
ەل تاريحىندا تۇڭعىش رەت بىردەن 10 ۇلتتىق جوبا قابىلداندى. ولار قوعام مەن مەملەكەت ءومىرىنىڭ بارلىق ماڭىزدى قىرىن، سونداي-اق، ەكونوميكانىڭ باسىم سالالارىن قامتيدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
ءبىلىم جانە عىلىم ءمينيسترى اسحات ايماعامبەتوۆتىڭ مالىمەتىنشە، «ءبىلىمدى ۇلت – ساپالى ءبىلىم بەرۋ» ۇلتتىق جوباسى اياسىندا 2025 جىلعا دەيىن 1 مىڭ جاڭا مەكتەپ تۇرعىزىلادى. وسىلايشا، ەلدەگى ءۇش اۋىسىمدى مەكتەپتەر تولىعىمەن جويىلماق.
جالپى، ۇلتتىق جوبا 4 باعىت، 5 مىندەت، 15 كورسەتكىش جانە 26 ءىس-شاراعا نەگىزدەلىپ وتىر.
«بۇرىنعى مەملەكەتتىك باعدارلامالاردان بۇل ۇلتتىق جوبانىڭ ايىرماشىلىعى – وعان ءبارى جاۋاپتى بولادى، ونى باقىلاۋ قولعا الىنادى. وسى جوبا ارقىلى قانشاما رەسۋرستار، مۇمكىندىكتەر بەرىلىپ وتىر. شىنىمەن دە، پاندەميا كەزىندە كوپ نارسەنى ءتۇسىنىپ قالدىق. سوندىقتان ەكونوميكامىز كوتەرىلۋى ءۇشىن جان-جاقتى ءبىلىم كەرەك. ءبىلىم-عىلىمدى دامىتۋىمىز كەرەك»، – دەدى ق ر جوعارى وقۋ ورىندارى قاۋىمداستىعىنىڭ پرەزيدەنتى راحمان الشانوۆ.
ءبىلىم ساپاسى بويىنشا قالا مەن اۋىل اراسىنداعى الشاقتىقتى ازايتۋ ءارى رەسپۋبليكانىڭ ءبىلىم دەڭگەيىن ارتتىرۋ ءۇشىن كەشەندى شارالار قاراستىرىلعان. سونداي-اق، «سيفرلىق ۇستاز» جوباسى دا ىسكە اسىرىلماق. ال 2025 جىلعا قاراي شاعىن قالالار مەن اۋدان ورتالىقتارىندا جانە اۋىلداردا 5 مىڭ مەكتەپ جاڭارتىلادى.
ايتا كەتۋ كەرەك، اتالعان جوبا تەحنيكالىق جانە كاسىپتىك سالالارعا دا ءبىراز وزگەرىستەر اكەلەدى دەپ كۇتىلىپ وتىر.