كانادا مەن اقش-تىڭ شەكاراسىندا ورنالاسقان ايگىلى نياگارا سارقىراماسى قازاقستان تۋىنىڭ تۇسىنە بويالدى.
وسىلايشا رەسپۋبليكا كۇنىندە مىڭداعان تۋريست الەمدەگى ەڭ كورىكتى جەرلەرىنىڭ بىرىنەن ەلىمىزدىڭ بايراعىن تاماشالادى. ارنايى جارىق بەرۋ قۇرىلعىلارى ارقىلى كوك سارى تۇسكە ەنگەن سارقىرامانىڭ ەرەكشە بەينەسى ءبىر ساتكە تۋريستەردى ءتانتى ەتتى، دەپ حابارلايدى Almaty-akshamy.kz
سونىمەن قاتار، رەسپۋبليكا كۇنىنە وراي كانادانىڭ ەكى بىردەي قالاسىندا قازاقستان تۋى كوتەرىلدى. تورونتودا جانە العاش رەت كالگاري قالاسىندا كوك بايراعىمىز جەلبىرەدى.بۇل شارالار قوس مەملەكەتتىڭ اراسىنداعى جوعارى ديپلوماتيالىق قارىم-قاتىناستىڭ ايقىن كورىنىسى ىسپەتتى.
اقشتىڭ مەگاپوليسى نيۋ-يوركتە دە ەلىمىزدىڭ ءانۇرانى شىرقالىپ، كوك بايراعى كوتەرۋ ءراسىمى ءوتتى. سالتاناتتى شاراعا قالا مەرى ەريك ادامس قاتىسىپ ەلىمىزدى مەرەكەمەن قۇتتىقتادى. سونداي-اق گەنناديي گولوۆكيننىڭ جانكۇيەرلەرى، قازاقستاندىق ستۋدەنتتەر مەن وتانداستىرمىز دا كەلدى.
«نيۋ-يوركتەگى قازاقتار قاۋىمداستىعى ۇيىمشىل ءارى مىقتى بيزنەس يەلەرى. ولار وتباسىلىق قۇندىلىقتى جوعارى قوياتىن، قوعامدىق قاۋىپسىزدىككە ۇلكەن ءمان بەرەتىن تاماشا ازاماتتار. سوندىقتان تۋدى كوتەرىپ قۇرمەت كورسەتكەنىمىزگە قۋانىشتىمىز»، - دەيدى نيۋ-يورك قالاسىنىڭ مەرى ەريك ادامس.