«Tartyl Fest» جوباسىنىڭ امباسسادورى، قازاقستانداعى Street workout قوزعالىسىنىڭ نەگىزىن قالاۋشىلاردىڭ ءبىرى ايتىم جاقىپوۆ الماتىداعى سپورتتىق مەرەكەنىڭ قالاي ءوتىپ جاتقاندىعى تۋرالى ايتىپ بەردى.
«ءبىرىنشى كەزەكتە «دارا» تالانتتاردى قولداۋ قورى مەن الماتى اكىمدىگىنە ءىس-شارانى ۇيىمداستىرۋداعى كومەگى مەن حالىق اراسىندا بۇقارالىق سپورتتى دامىتۋداعى ۇلەسى ءۇشىن العىس ايتامىن.
الماتى بۇگىن شىنىمەن دە بارلىق رەكوردتاردى جاڭارتىپ جاتىر. تاڭعى ساعات 9-داردىڭ وزىندە قاتىسۋشىلاردىڭ كەزەگى «اباي» الاڭىنان كوشەگە دەيىن سوزىلدى. بۇعان دەيىن تالدىقورعان قالاسىندا قاتىسۋشىلار جالپى سومادا 4731 رەت تارتىلعان. بۇگىن وڭتۇستىك استانامىزدا بۇل كورسەتكىش جاڭارىپ، كۇننىڭ اياعىنا دەيىن ازاماتتارىمىز كەمىندە 10 مىڭ رەت تارتىلادى دەپ ويلامىز.
نەگىزى ماقسات – بۇقارالىق سپورتتى دامىتۋ، سالاۋاتتى ءومىر سالتىن دارىپتەۋ. سوندىقتان قانداي سپورتتا بولماسىن دۇرىس باعىتتا، ەرەجەلەرگە ساي جارىسايىق.
بارلىق قاتىسۋشىلاردى كاسىبي سپورتشىلار باقىلاپ، ناتيجەلەرىن جازىپ الۋدا. بۇگىنگى تورەشىلەردىڭ قاي قايسىسى دا تارتىلۋ ەرەجەلەرىن وتە جاقسى بىلەدى. الداعى ۋاقىتتا وسى توبىمىزبەن ەلىمىزدىڭ 20 قالاسىن ارالاۋدى جوسپارلاپ وتىرمىز. ءار قالاداعى جۇلدەلى ورىندار مەن اقشالاي سىيلىقتار بەرىلەدى. ال قىركۇيەك ايىندا بارلىق مىقتىلار ەلوردامىزعا شاقىرىلىپ، نۇر-سۇلتان قالاسىندا شەشۋشى جارىس وتەدى.
ارتىق ايتقانىم ەمەس، بۇگىن قازاقستانداعى Street workout سالاسى دامۋ قارقىنى بويىنشا الەمدە ءبىرىنشى ورىندا دەپ ايتا الامىن. سەبەبى ءبىزدىڭ ەلىمىز – الەمدەگى Street workout-قا مەملەكەتتىك دەڭگەيدە كومەك كورسەتەتىن جالعىز مەملەكەت.
قاتىسۋشىلاردىڭ جاس توبىنىڭ نەگىزگى بولىگىن 18-30 جاستاعى ازاماتتارىمىز قۇرايدى. الايدا قاي قالاعا بارساق تا تارتىلۋعا كەلگەن كىشكەنتاي بۇلدىرشىندەر مەن اقساقالدارىمىزدى كورەمىز. بۇل ارينە كوڭىل قۋانتادى. Street workout-قا بارلىق جاستاعى ادامدار قاتىسا الادى جانە ول دەنساۋلىقتى كۇشەيتۋگە كومەكتەسەدى».