پرەزيدەنت تەلەراديوكەشەنىنىڭ كرەاتيۆ ديرەكتورى، پروديۋسەر نۇرلان قويانبايەۆ الماتىدا ءوتىپ جاتقان «Tartyl Fest» فەستيۆالى تۋرالى پىكىرىن ءبولىستى.
- 4-5 اي بۇرىن ءارتۇرلى سۇحباتتاردا بۇقارالىق سپورتتى دامىتۋ تۋرالى ايتقانمىن. بارلىق ادامداردىڭ قول جەتەتىندەي مۇمكىندىك جاساساق دەگەن وي بولعان. جاقىندا قازاقستان پرەزيدەنتىنىڭ قولداۋىمەن «دارا» دارىندىلاردى قولداۋ» قورى اشىلدى. بۇل قور ەل ىشىندە وسىنداي ءىرى شارالار وتكىزىپ، مىقتى-مىقتى ازاماتتارىمىزدى ىرىكتەپ، ولاردى الەمدىك جارىستارعا الىپ باراتىن كوپىر بولۋى كەرەك. باستى ماقساتىمىز – وسى. ەگەر وسىنداي فەستيۆالدەردەن ءوز جولىن باستاپ، حالىقارالىق سايىستاردا جىگىتتەرىمىز جۇلدەلى ورىندار الىپ جاتسا، بۇل جاستارىمىز ءۇشىن ۇلكەن ونەگە بولادى. سونداي-اق بۇقارالىق سپورتتىڭ دامۋىنا ۇلكەن ۇلەس قوسادى.
«Tartyl Fest» – «دارا» دارىندىلاردى قولداۋ» قورى ۇيىمداستىرعان العاشقى شارا. فەستيۆال بۇعان دەيىن تالدىقورعان جانە قونايەۆ قالالارىندا ءوتتى.
بۇگىنگى شارانى تەك جارىس رەتىندە ەمەس، مەرەكە رەتىندە ۇيىمداستىرعىمىز كەلدى. دەگەنمەن وسىنشا كوپ ادام كەلەدى دەپ ويلامادىق. ادامداردىڭ سپورتقا دەگەن قىزىعۋشىلىعى كوڭىل قۋانتادى. جالپى فەستيۆالدە جارىستان بولەك، كونسەرت تە مۋزىكا دا بولادى. ونىڭ سەبەبى، ءقازىر الەۋمەتتىك جەلىلەردە، ەل اراسىندا نەگاتيۆ كوپ. «ارەكەت بار دا، بەرەكەت بار» دەمەكشى، وسى كۇنى الماتى حالقىنا قۋانىش سىيلايتىنداي شارا وتكىزگىمىز كەلدى.
مەن ءوزىم تاڭەرتەڭ كەلىپ، 4 رەت تارتىلدىم. وندا تۇرعان ەشقانداي ۇيات جوق. بۇل كورسەتكىشكە ءار قالادا ەكى رەتتەن قوسىپ تۇرماقپىن. جارىس ءوزى 60 كۇن بولادى. بارلىق 20 قالانى ارالاپ بولعاندا، 15-20 رەت تارتىلامىن دەگەن نيەتتەمىن. بۇل – مەنىڭ الدىما قويعان ماقساتىم. وسى چەللەندج ارقىلى جاستارعا كۇندەلىكتى سپورتپەن اينالىسۋدىڭ پايداسىن كورسەتىپ، دارىپتەگىم كەلەدى.
تاعى ءبىر ماقساتىمىز – فەستيۆالدى جىل سايىن وتكىزۋ. بۇل شارا جىلدا وتكىزىلەتىن بولسا، الداعى 5-6 جىلدا سپورتقا قىزىعاتىن، دەنەسى شىنىققان ميللونداعان ازامات تاربيەلەيمىز دەگەن ويدامىن.