«TARTYL FEST» رەسپۋبليكالىق تۋرنيكتە تارتىلۋ فەستيۆالىندە اعا بۋىن وكىلدەرى دە ەرەكشە بەلسەندىلىك تانىتۋدا. ولار دا جاستاردان قالىسپاي تۋرنيككە تارتىلۋدان كوش باستاپ تۇر. جەڭۋدى ماقسات ەتپەسە دە، قاتىسۋدى مىسە تۇتقان تۇرعىنداردىڭ قۋانىشىندا شەك جوق.
«مەنىڭ جاسىم 62-دە. وسى الماتى قالاسىنىڭ تۇرعىنىمىن. ءوزىم دە ءبىراز جىلدار سپورتپەن اينالىسقاندىقتان تۋرنيككە تارتىلۋدان جارىس وتەتىنىن ەستىگەندە قۋانىپ قالدىم. نەمەرەلەرىمدى تاماشالاۋعا ەرتىپ كەلدىم. جاستارمەن تايتالاسا الماساق تا باعىمىزدى سىناپ كوردىك. مىنا جەردەن قاتارلاستارىمدى دا كورىپ قالدىم. ۇيدە اياقتى كوتەرىپ قويىپ جاتقانان گورى سپورتپەن اينالىسقانىمىز جاستارعا ۇلگى بولماق. جارىستى ۇيىمداستىرۋشىلارعا ايتار ءبىر تىلەگىم بار، 50-60 جاس ارالىعىنداعى بۋىندى جەكە توپتاستىرسا دەگەن ۇمىتتەمىن. ويتكەنى 30 جاسار ازاماتتاردىڭ كۇشى بىزدەن ءبارىبىر باسىمدىراق بولادى عوي. وسى جاعىن دا ەسكەرسە دەيمىن. اعا بۋىننىڭ وسىنداي شارالاردا بىلەك سىبانا كىرىسكەنى جاقسى ەمەس پە؟»،–دەيدى قاتىسۋشى ورازبەك جانتەكەيەۆ.