مۇحتار اۋەزوۆ اتىنداعى قازاق ۇلتتىق دراما تەاترىنىڭ ساحناسىندا كلاسسيك جازۋشى ش.ايتماتوۆتىڭ «كاسساندرا تاڭباسى» فۋتۋريستىك تراگەدياسىنىڭ پرەمەراسى ءوتتى.
سپەكتاكل ادامزاتتىڭ رۋحسىزدانۋ ماسەلەسى وتباسىلىق قۇندىلىقتاردىڭ قادىر-قاسيەتىمەن شەندەستىرىلە كورسەتىلەدى. قويىلىمدا فيلوفەي (كوسموستىق موناح) ءرولىن ازات سەيتمەتوۆ سومدادى. قويىلىمدا فيلوفەي شارانانىڭ قارسىلىق بەلگىسىن عارىشتان زونداج ساۋلەلەر جىبەرۋ ارقىلى انىقتاپ، وعان «كاسساندرا تاڭباسى» دەپ ات بەرەدى. ال وسىناۋ جاماندىقتارعا قارسى تۇرىپ، ادالدىقتىڭ اق تۋىن كوتەرگەن مەيىرىمدى رۋنانى جانار جانامانوۆا وينادى. رەجيسسەر كەيبىر وقيعانى بۇگىنگى جاعدايمەن ۇشتاستىرعان، وزىنشە وي-شەشىمىن ۇسىنعان.
«سپەكتاكلدى ساحنالاۋعا ۇزاق ۋاقىت دايىندالدىق. اكتەرلىك قۇرامعا العىسىمدى بىلدىرەمىن. قويىلىمدى كوپشىلىك تۇسىنە قويماۋى مۇمكىن. ءبىز قويىلىم ارقىلى ادامداردىڭ بىر-بىرىنە دەگەن سۇيىسپەنشىلىگىن ارتتىرعىمىز كەلەدى. سونداي-اق، جاساندى تۇسىك تاستاۋدىڭ اسەرىن، ءقاۋىپىن جەتكىزگىمىز كەلدى. بولاشاق ۇرپاعىمىزدىڭ ومىرىنە جاۋاپكەرشىلىكپەن قاراپ، سۇيىسپەنشىلىك تانىتقانىن قالايمىز. قويىلىمنىڭ ويلى-قىرلى ساتتەرىن كورەرمەن تۇسىنىستىكپەن قاراپ، ءبىزدىڭ، جازۋشىنىڭ ايتقىسى كەلەتىن ويىن تۇسىنسە دەيمىز»، – دەيدى رەجيسسەر اريداش وسپانبايەۆا.
نەبىر اپاتتاردىڭ باستاۋى – تەكسىزدىك. ايتماتوۆ وسيەتى بۇگىن دە اسا وزەكتى ەكەندىگىن ۇعىندىق. وسىنداي ماڭىزدى ويدى كوتەرىپ، شىعارمانىڭ سيۋجەتىن قۇرۋدا ۇلكەن قىزمەت ەتىپ تۇرعان «جاساندى جولمەن ادام اكەلۋ» وقيعاسى — بۇگىنگى زامان شىندىعىمەن بەتپە-بەت كەلگەندە تۋعان سۋرەتكەرلىك قيال ناتيجەسى. سويتە تۇرا، مۇنىڭ نەگىزىندە ءومىردىڭ شىندىق قۇبىلىستارى جاتقانى دا انىق.