سپورت جانە دەنە شىنىقتىرۋ ىستەرى كوميتەتى ءتوراعاسىنىڭ ورىنباسارى ايگۇل بەكتەنوۆا ورتالىق كوممۋنيكاسيالار قىزمەتىندە وتكەن بريفينگىدە استاناداعى ازيا چەمپيوناتىندا قازاقستان بالۋاندارىنا قانداي مىندەت جۇكتەلىپ وتىرعانى تۋرالى سۇراققا جاۋاپ بەردى، دەپ حابارلايدى اlmaty-akshamy.kz قازاقپاراتقا سىلتەمە جساپ.
«كەز كەلگەن سپورتشى وليمپ شىڭىن باعىندىرام، جۇلدەلى ورىن الام دەپ دايىندالادى. ءبىراق، تۇعىردا ءۇش ورىن عانا بار. الايدا، كۇرەس تۇرلەرىنەن 4 ورىن بار (ەكى ءۇشىنشى ورىن – رەد.). ءارقايسىسى بارىنشا كۇش-جىگەرىن سالىپ، ەل نامىسىن ابىرويمەن قورعاپ شىعادى دەپ ويلايمىز»، - دەگەن كوميتەت وكىلى ەشبىر بالۋاننىڭ اتىن ناقتى اتامادى.
ونىڭ پايىمىنشا، ءقازىر بالۋانداردىڭ نەگىزگى نازارى كۇزدە سەربيا استاناسىندا وتەتىن جارىسقا اۋىپ وتىر.
«بۇل ازيا چەمپيوناتىنىڭ الدىندا ءار كۇرەس تۇرىنەن ەكى كەزەڭنەن تۇراتىن جاتتىعۋ جيىندارى وتكىزىلدى. سونىمەن قاتار، الەم چەمپيوناتىنا دا دايىندىق قارقىندى ءجۇرىپ جاتىر. جاتتىعۋ جيىندارى، جارىستار بەلگىلەنگەن جۇمىس جوسپارى بويىنشا جۇرگىزىلەدى. قىركۇيەك ايىندا بەلگراد (سەربيا) وتەتىن الەم چەمپيوناتى ليسەنزيالىق تۋرنير بولىپ ەسەپتەلەدى. سودان ءبىر اپتا وتكەندە ازيا ويىندارى باستالادى. سوندىقتان، جاتتىقتىرۋشىلار باستى نازاردى الەم چەمپيوناتىنا ءبولىپ وتىر. ويتكەنى، ول جاقتا وليمپيادا ويىندارىنا جولداما ساراپقا سالىنادى»، - دەدى ايگۇل بەكتەنوۆا.
بۇعان دەيىن ازيا چەمپيوناتىندا قازاقستان اتىنان شىعاتىن تاجىريبەلى بالۋاندار كىمدەر ەكەنى تۋرالى جازعان بولاتىنبىز.