زاۋىت 2022 جىلى بانكروتقا ۇشىراسا دا، ۇزاق ۋاقىت جۇمىسىن توقتاتپاعان.
2022 جىلدىڭ قىركۇيەگىندە اقتوبە وبلىسىنىڭ مامانداندىرىلعان اۋدانارالىق سوتى "اقتوبە وندىرىستىك كومپانياسى" ج ش س بانكروتقا ۇشىراعان باسقارۋشىسىنىڭ، ياعني قازاقستاننىڭ ەكس-پرەزيدەنتىنىڭ ءىنىسى بولات نازاربايەۆتىڭ ۇستىنەن بەرگەن تالاپ-ارىزى بويىنشا شەشىم شىعاردى، دەپ جازادى Almaty-akshamy.kz Liter.kz-كە سىلتەمە جاساپ.
2007-2012 جىلدار ارالىعىندا "كەڭەستىك الكوگول يندۋسترياسى" ج ش س (سوۆالكوپروم) دەگەن اتاۋمەن ەتيل ءسپيرتىن شىعارعان. 2012 جىلى كومپانيا يەلەرىن تولىعىمەن اۋىستىردى. كەنەت قۇرىلتايشىلار قاتارىنا بولات نازاربايەۆ پەن تاحير گۋسەينوۆ كىرىپ، كومپانيا اتاۋى "BN Aktobe" ج ش س بولىپ وزگەرتىلگەن. كاسىپورىننىڭ اتاۋى ەندى الكوگولگە قاتىستى بولماسا دا، ج ش س ەتيل ءسپيرتىن ءوندىرۋدى جالعاستىرىپ وتىرعان.
2018 جىلى كومپانيانىڭ اتاۋى "اقتوبە وندىرىستىك كومپانياسى" ج ش س بولىپ قايتا تىركەلىپتى. ياعني، ودان بولات نازاربايەۆتىڭ قىسقارتىلعان ءاتى-جونى الىنىپ تاستالدى. ءبىراق ول دا، سەرىكتەسى تاحير گۋسەينوۆ تە ءالى كۇنگە دەيىن ونىڭ يەلەرى بولىپ قالا بەردى.
ال 2022 جىلى بانكروتتىق جونىندەگى مەنەدجەردىڭ بولات نازاربايەۆقا قارسى شاعىمى بويىنشا سوت پروسەسى باستالعان.
سوت وتىرىسىندا انىقتالعانداي، 2013 جىلى زاۋىتتىڭ قوجايىنى اتانعان بولات نازاربايەۆ 1،5 ملرد تەڭگەگە نەسيە شارتىن جاساسقان. ونىڭ ايتۋىنشا، نازاربايەۆ بۇل اقشانى 10 جىل ىشىندە، پايىزسىز نەسيە شارتىمەن كومپانياعا بىرتىندەپ قۇيىپ جاتىر.
2020 جىلدىڭ 2 ساۋىرىندەگى جاعداي بويىنشا، كومپانيانىڭ بولات نازاربايەۆ الدىنداعى قارىزى 1،2 ملرد تەڭگە بولدى. ونى وتەۋ ءۇشىن ج ش س بارلىق مۇلكىن اۋكسيون ارقىلى ساتۋعا تىرىسادى، ءبىراق ولار ساتسىزدىككە ۇشىرايدى. بولات نازاربايەۆ بولسا، كومپانيانىڭ بارلىق اكتيۆىن 751 ميلليون تەڭگەگە ساتىپ الادى. نازاربايەۆتىڭ اقشاسىن تولەپ، 2021 جىلى كومپانيا بانكروتقا ۇشىراپ، بانكروتتىق ءراسىمىن جۇرگىزۋگە ارىز جازعان.