جوعارعى سوت الماتى سوتىنىڭ 2012 جىلعى شەشىمىن جويدى.
بولات نازاربايەۆ الماتى اۋىر ماشينا جاساۋ زاۋىتىنىڭ اكسيالارىن مەملەكەتكە قايتارادى، دەپ حابارلايدى Almaty-akshamy.kz
جوعارعى سوتتىڭ ازاماتتىق ىستەر جونىندەگى سوت القاسى قارجى مينيسترلىگى مەملەكەتتىك مۇلىك جانە جەكەشەلەندىرۋ كوميتەتىنىڭ تالاپ-ارىزى بويىنشا بولات نازاربايەۆ پەن PLS-TM جشس-نى الماتى اۋىر ماشينا جاساۋ زاۋىتىنىڭ اكسيالارىن مەملەكەت مەنشىگىنە قايتارۋعا مىندەتتەدى.
قاۋلى بويىنشا، مەملەكەتتىك مۇلىك جانە جەكەشەلەندىرۋ دەپارتامەنتى 1998 جىلى "امجز" اق-نىڭ جارعىلىق كاپيتالىنىڭ 31،9 پايىزى كولەمىندەگى اكسيالارىنىڭ مەملەكەتتىك پاكەتىن تەندەر جەڭىمپازى – "تەمىر كون" جشس-نە 105،3 ميلليون تەڭگەگە ساتقان. ساتىپ الۋ-ساتۋ شارتى بويىنشا جاڭا يەلەنۋشى زاۋىتتىڭ ءپروفيلىن ساقتاپ، ءونىم كولەمىن ۇلعايتۋى كەرەك ەدى.
2007 جىلى "تەمىر كون" ج ش س "امجز" اق اكسيالارىنىڭ 86،78 پايىزىن، ونىڭ ىشىندە مەملەكەتتىك ۇلەسىنىڭ 31،9 پايىزىن بولات نازاربايەۆقا ساتتى. 2009 جىلى "فيرما باياۋ" ج ش س زاۋىتتىڭ ماتەريالدىق-تەحنيكالىق بازاسى قاناعاتتانارلىقسىز جاعدايدا، وندىرىستىك كورسەتكىشتەر تومەندەپ، مۇلىك كەشەنى مەن جەر ىدىراپ جاتىر، عيماراتتار مەن قۇرىلىستار جالعا نەمەسە ءۇشىنشى تۇلعالارعا ساتىلىپ جاتىر دەگەن قورىتىندىعا كەلدى. بۇل - مىندەتتەمەلەردى ورىنداماۋ. 2009 جىلى بولات نازاربايەۆ كەلىسىمشارت بويىنشا ەشقانداي مىندەتتەمەلەردى ورىنداماي، PLS-TM ءجشس-نىڭ باسقا دا اكسيالارىمەن بىرگە مەملەكەتكە تيەسىلى ۇلەستى ساتقان.
"مەملەكەتتىك اكسيالار پاكەتىنىڭ يەسى بولا وتىرىپ، بولات نازاربايەۆ ءبىرىنشى شارتتىڭ ەرەكشە تالاپتارىن ورىنداۋ بويىنشا مىندەتتەمەلەردى وزىنە الدى. بولات نازاربايەۆتىڭ زاۋىت قىزمەتىنىڭ بەيىنىن ساقتاۋ، ءوندىرىس كولەمىن ۇلعايتۋ، PLS-تم جشس-مەن شارت جاساسقاندا قاۋىپسىزدىك ستاندارتتارىن ورىنداۋ جونىندەگى مىندەتتەمەلەرى توقتاتىلعان جوق. بولات نازاربايەۆ داۋلى اكسيالاردى جاڭا ساتىپ الۋشىعا ءوز مىندەتتەمەلەرىن بەرمەي يەلىكتەن شىعارۋعا قۇقىلى ەمەس ەدى"، - دەلىنگەن قاۋلىدا.
قاۋلىعا سايكەس، ءتۇرلى سوت ورگاندارى بۇل ءىستى بىرنەشە رەت قاراعان. 2011 جىلعى اقپاندا كوميتەت بەرگەن تالاپ-ارىزدى الماتى اۋەزوۆ اۋدانىنىڭ №2 سوتى قاناعاتتاندىردى. الماتى قالالىق سوتىنىڭ اپەللياسيالىق جانە كاسساسيالىق سوت القالارى بۇل شەشىمدى قولداعان. الايدا، 2012 جىلى جوعارعى سوتتىڭ سوت القاسى شەشىمنىڭ كۇشىن جويىپ، ءىستى ءبىرىنشى ساتىداعى سوتقا قايتا قاراۋعا جىبەردى. بۇل جولى الماتى اۋەزوۆ اۋدانىنىڭ №2 اۋداندىق سوتى كوميتەتكە تالاپتى قاناعاتتاندىرۋدان باس تارتتى. شەشىمدى الماتى سوتىنىڭ ازاماتتىق جانە اكىمشىلىك ىستەر جونىندەگى اپەللياسيالىق سوت القاسى راستادى. الايدا بيىل باس پروكۋرور بۇل شەشىمدى داۋلاۋ تۋرالى شەشىم قابىلدادى.
بولات نازاربايەۆ تا، مەملەكەتتىك مۇلىك كوميتەتىنىڭ وكىلدەرى دە سوت وتىرىسىنا كەلمەگەن. باس پروكۋروردىڭ دالەلدەرىن زەردەلەگەننەن كەيىن جوعارعى سوت القاسى داۋلى سوت اكتىلەرىن كاسساسيالىق تارتىپپەن قايتا قاراۋ ءۇشىن ايرىقشا نەگىزدەر بار دەگەن قورىتىندىعا كەلدى.
جوعارعى سوت باس پروكۋروردىڭ نارازىلىعىن قاناعاتتاندىرىپ، الماتى سوتىنىڭ 2012 جىلعى شەشىمىن جويدى.
"بولات نازاربايەۆ پەن PLS-تم ج ش س اراسىندا جارعىلىق قوردىڭ 31،9 پايىزى "الماتى اۋىر ماشينا جاساۋ زاۋىتى " اق-نىڭ جاي اتاۋلى اكسيالارىن ساتۋ بولىگىندە جاسالعان 2009 جىلعى 2 ساۋىردەگى باعالى قاعازداردى ساتىپ الۋ-ساتۋ شارتى جارامسىز دەپ تانىلسىن. تاراپتاردى باستاپقى قالىپقا كەلتىرۋ كەرەك. بولات نازاربايەۆقا "امجز" اق-نىڭ قاراپايىم اتاۋلى اكسيالارىن زاۋىتتىڭ جارعىلىق كاپيتالىنىڭ 31،9 پايىزى مولشەرىندە مەملەكەت مەنشىگىنە قايتارۋعا مىندەتتەلسىن"، - دەلىنگەن قاۋلىدا.