ارالدى سەكسەۋىل ساقتاي ما؟

2025 جىلعا دەيىن ارالدىڭ 1،1 ملن گەكتار اۋماعىنا سەكسەۋىل كوشەتىن وتىرعىزۋ جوسپارلانعان.

ەكولوگيالىق احۋالدى جاقسارتۋ ءۇشىن ارال تەڭىزىنىڭ قۇرعاپ قالعان تابانىندا فيتوورمانمەليوراتيۆتىك جۇمىس جۇرگىزىلىپ جاتىر، دەپ حابارلايدى Almaty-akshamy.kz.

بۇل جايىندا پرەمەر-مينيستردىڭ ءبىرىنشى ورىنباسارى رومان سكلياردىڭ سەنات دەپۋتاتتارىنىڭ ساۋالىنا بەرگەن جاۋابىندا ايتتى. بيىل 188،8 مىڭ گەكتار القاپقا 409،4 ملن ءتۇپ اعاش وتىرعىزۋ جوسپارلانعان.

«قازىرگى ۋاقىتتا مەملەكەتتىك ورمان قورىنىڭ جالپى اۋماعى - 30،5 ملن گەكتار، ونىڭ ىشىندە ورمان جاپقان اۋماق - 13،6 ملن گەكتار. مەملەكەت باسشىسىنىڭ ورمان قورى جەرلەرىندە 2 ملرد ءتۇپ اعاش وتىرعىزۋ تاپسىرماسىن ورىنداۋ ماقساتىندا ءار وڭىردە ورماندى مولىقتىرۋ جانە اعاش ءوسىرۋ كەشەندى جوسپارى ازىرلەنىپ، بەكىتىلدى. ايتالىق، 2021 جىلى - 130 ملن ءتۇپ، 2022 جىلى - 282 ملن ءتۇپ اعاش وتىرعىزىلىپ، جىلدىق جوسپار 100 پايىز ورىندالدى. بيىل 188،8 مىڭ گەكتار القاپقا 409،4 ملن ءتۇپ اعاش وتىرعىزۋ جوسپارلانعان»، - دەپ اتاپ ءوتتى ۇكىمەت باسشىسىنىڭ ءبىرىنشى ورىنباسارى ءوز جاۋابىندا.

ونىڭ ايتۋىنشا، ورمان قورىن تولىقتىرۋ جونىندەگى ءىس-شارالاردى جوسپارلى جۇزەگە اسىرۋ 2029 جىلعا قاراي ورمان جاپقان جەر اۋماعىن 14،5 ملن گەكتارعا دەيىن جەتكىزۋگە مۇمكىندىك بەرەدى.