ناۋرىزناما مەرەكەلىك اپتالىعى اياسىندا قازاق ۇلتتىق اگرارلىق زەرتتەۋ ۋنيۆەرسيتەتىندە ۇلتتىق سپورت كۇنىنە وراي ستۋدەنتتەر اراسىندا جارىستار ءوتتى.
ۋنيۆەرسيتەت ستاديونىندا جاستار ساداق اتۋ، قازاق كۇرەسى، اسىق اتۋ، توعىزقۇمالاق، ارمرەستلينگ سياقتى ءداستۇرلى سپورت تۇرلەرىنەن ءوزارا سايىسقا ءتۇستى.
قازۇايۋ رەكتورىنىڭ ورىنباسارى ايتجان ءابدىروۆ تە جارىسقا قاتىسىپ، ساداق تارتىپ، نىساناعا ءدوپ تيگىزۋگە تالپىندى. ول ستۋدەنتتەرمەن بىرگە كەزەككە تۇرىپ، ۇلتتىق سپورت تۇرلەرىن ءوز كوزىمەن تاماشالاپ، كەيىن ءوز ويىمەن ءبولىستى.
– بارشا قازاقستاندىقتاردى ناۋرىز مەرەكەسىمەن قۇتتىقتايمىن! ۇلتتىق سپورت كۇنىن ۇيىمداستىرۋداعى ماقساتىمىز – ستۋدەنتتەرىمىزگە ءداستۇرلى ويىندار ارقىلى ۇلى دالا رۋحىن سەزىندىرۋ. ۇلتتىق مەرەكەلەر كەزىندە وينالاتىن قىزىقتى ءارى پايدالى ويىنداردى جاڭعىرتۋ ارقىلى ءبىز ءوز بولاشاعىمىزعا سەنىمدى قادام باسامىز. اۋىل شارۋاشىلىعى مەن مال شارۋاشىلىعى سالاسىندا قىزمەت ەتەتىن بولاشاق ماماندارعا تەك عىلىمي ءبىلىم عانا ەمەس، سونىمەن قاتار ۇلتتىق مادەنيەتتى تانۋ دا اسا ماڭىزدى. سەبەبى، حالقىمىز ەجەلدەن بەرى كۇش پەن توزىمدىلىكتى جوعارى باعالاعان. ال سپورتپەن اينالىسپاي، دەنە تاربيەسىمەن اينالىسپاي، قازىرگى زامان جاستارىنىڭ ءوز ورنىن تابۋى قيىن، – دەيدى ايتجان ءابدىروۆ.
