الماتى قالاسىندا ناۋرىز مەيرامىن اتاپ ءوتۋ اياسىندا بوستاندىق اۋدانىنىڭ وقۋشىلارى اراسىندا ۇلتتىق سپورت تۇرلەرىنەن جارىستار ءوتتى.
بۇگىن №140 مۇقاعالي ماقاتايەۆ اتىنداعى گيمنازيادا اۋداننىڭ 9-11 سىنىپتارىنان 300-دەن استام وقۋشى جينالدى.
«ءبىز مۇنداي ءىس-شارالاردى جىل سايىن ۇيىمداستىرامىز. باستى ماقساتىمىز – ءداستۇرلى قازاق ويىندارىن ناسيحاتتاۋ، ۇلتتىق قۇندىلىقتاردى نىعايتۋ، ءپاتريوتيزمدى تاربيەلەۋ جانە جاستاردىڭ سپورتتىق رۋحىن دامىتۋ. بالالاردىڭ فيزيكالىق قابىلەتتەرىن، كوماندالىق رۋحىن شىڭداۋ جانە ەڭ باستىسى، سالاۋاتتى ءومىر سالتىن قالىپتاستىرۋ وتە ماڭىزدى»، – دەدى بوستاندىق اۋداندىق ءبىلىم ءبولىمىنىڭ باسشىسى ايگۇل قاسىمبەك.
اۋدان مەكتەپتەرىنىڭ وقۋشىلارى قازاق كۇرەسى، اسىق اتۋ، ارقان تارتۋ جانە باسقا دا سپورت تۇرلەرىنەن وزدەرىنىڭ كۇشىن، ەپتىلىگىن جانە توزىمدىلىگىن كورسەتتى.
«اسىق ويناۋدى ماعان اتام ۇيرەتكەن، ءبىز بىرگە ءجيى اسىق اتىسامىز. دالا وركەنيەتىنەن باستاۋ الاتىن وسىنداي ۇلتتىق ويىنداردىڭ بۇگىنگى كۇنگە دەيىن ساقتالىپ، مەملەكەت تاراپىنان قولداۋ تاۋىپ جاتقانىنا وتە قۋانىشتىمىن»، – دەدى №165 مامانداندىرىلعان ليسەيىنىڭ وقۋشىسى سوفيا ري.
ۇيىمداستىرۋشىلار مەن قوناقتاردىڭ ايتۋىنشا، جارىس جوعارى دەڭگەيدە ءوتتى. بارلىق قاتىسۋشىلار جاقسى فيزيكالىق دايىندىقتارىن كورسەتىپ، جەڭىسكە دەگەن جىگەر تانىتتى. جەڭىمپازدار ارنايى گراموتالارمەن ماراپاتتالدى.