الماتى قالاسىنداعى SOS بالالار اۋىلىندا تاربيەشىلەر مەن پسيحولوگتارعا ارنالعان «كونفليكتولوگيا جانە مەدياسيا نەگىزدەرى. ەتنومەدياسيانىڭ ەرەكشەلىكتەرى مەن قاعيدالارى» تاقىرىبىندا سەمينار-ترەنينگ ءوتتى.
ءبىلىم جەتىلدىرۋ ءدارىسىن الماتى قالاسى قحا ەتنومەدياسيا كەڭەسىنىڭ ءتوراعاسى، «حالىقارالىق قۇقىق قورعاۋ ورتالىعى» رقب پرەزيدەنتى ءجاندىلدا جاقىپوۆ قايىرىمدىلىق نەگىزدە وتكىزدى. سونداي-اق، اسسامبلەيانىڭ «جومارت جان» ورتالىعى بالالارعا ارنالعان قايىرىمدىلىق اكسياسىن ۇيىمداستىردى. يگى شارانى الماتى قالاسى ادىلەت باسقارماسىنىڭ «قوعامدىق كەلىسىم» كمم، «اسسامبلەيا جاستارى»، «جومارت جان» ورتالىعى جانە الماتى قالاسى قازاقستان حالقى اسسامبلەياسىنىڭ اقساقالدار كەڭەسى بىرلەسىپ ۇيىمداستىردى.
«مەملەكەت باسشىسى قاسىم-جومارت توقايەۆتىڭ تاپسىرماسىنا سايكەس ەلىمىزدە ناۋرىزناما تۇجىرىمداماسى بەكىتىلگەن بولاتىن. بۇگىن ءبىز سونىڭ اياسىندا الماتى قالاسىنداعى SOS بالالار اۋىلىنا كەلدىك. بۇل شارا قازاقستان حالقى اسسامبلەياسىنىڭ 30 جىلدىعىنا ارنالعان ماڭىزدى ءىس-شارالاردىڭ ءبىرى ەكەنىن ايتا كەتكەن ءجون. «جومارت جان» قايىرىمدىلىق ورتالىعىنىڭ وكىلدەرى بالالارعا دەپ ترەنينگتەر مەن ويىندارعا ارنالعان قۇرال-جابدىقتاردى سىيعا تارتتى. سونىمەن قاتار، قازاقستان ۇيعىرلارىنىڭ رەسپۋبليكالىق مادەني ورتالىعىنىڭ ءتوراعاسى دولكۋنتاي ابدۋلحاليل ءتۇرلى سىيلىقتارىن الا كەلدى. كەزدەسۋ اياسىندا بالالارعا ناۋرىز مەرەكەسىنىڭ ءمان-ماڭىزىن ءتۇسىندىرىپ، ءتۇرلى ويىندار ۇيىمداستىردى. بالالارعا قۋانىش سىيلاعان بۇل شارا – حالقىمىزدىڭ بەرەكە-بىرلىگىنىڭ، باۋىرمالدىعىنىڭ دالەلى»، – دەيدى الماتى قالاسى قحا اقساقالدار كەڭەسىنىڭ ءتوراعاسى بولات وسپانوۆ.
«جومارت جان» ورتالىعىنىڭ ءتوراعاسى دولكۋنتاي ءابدۋلحاليلدىڭ ايتۋىنشا، پرەزيدەنتىمىز جاستاردى ەلىن سۇيەتىن، ءبىلىمدى، ادال، جاۋاپكەرشىلىگى مول ازامات ەتىپ تاربيەلەۋگە ەرەكشە كوڭىل ءبولىپ وتىر. وسى ماقساتتا ءبىز دە ءوز جۇمىسىمىزدى جانداندىرىپ، ءتۇرلى يگى ىستەردى قولعا الدىق. بۇل باستاماعا اسسامبلەيا جانىنداعى اقساقالدار كەڭەسى مەن بەلسەندى جاستار بىرلەسىپ اتسالىستى.
«بالالارعا سىيلىقتار مەن ءتۇرلى تارتۋ جاساپ، مەرەكەلىك كوڭىل-كۇي سىيلادىق. اسسامبلەيا اياسىندا ءبىز جاستارمەن ءجيى كەزدەسىپ، ولاردى ەلىنە ادال قىزمەت ەتەتىن، تۋعان ەلىنىڭ دامۋىنا ۇلەس قوساتىن ازامات رەتىندە تاربيەلەۋگە كۇش سالىپ كەلەدى. ىنتىماقتاستىقتى ارتتىرىپ، جاستاردىڭ پاتريوتتىق رۋحىن كوتەرۋ – باستى ماقساتتارىمىزدىڭ ءبىرى. ءقازىر «تازا قازاقستان» باعدارلاماسى قولعا الىندى. وسى ناۋقان دا جاستاردى تاربيەلەۋدىڭ ءبىر باعىتى. ءبىر ادامنىڭ نەمەسە بەلگىلى ءبىر توپتىڭ مىندەتى ەمەس. سوندىقتان بارشامىز بىرىگە جۇمىس ىستەپ، ورتاق ماقساتقا ۇمتىلۋىمىز كەرەك. ناۋرىز مەرەكەسى قۇتتى بولسىن! ءاربىر شاڭىراققا باقىت، ىنتىماق، قۋانىش تىلەيمىن! ەلىمىز تىنىش، حالقىمىز امان بولسىن!»، – دەدى ول.