ناۋرىزدا تۇركىستاندا حالىقارالىق كورمە-جارمەڭكە وتەدى

شاراعا 20-عا جۋىق مەملەكەتتەن دەلەگاسيا قاتىسادى.

20-22 ناۋرىز كۇندەرى ءى KazAgro/KazFood Turkistan حالىقارالىق كورمە-جارمەڭكەسى وتەدى، دەپ حابارلايدى Almaty-akshamy.kz 

بۇدان وزگە ەلىمىزدىڭ بارلىق وڭىرىنەن اۋىل شارۋاشىلىعى سالاسىنىڭ وكىلدەرى، ينۆەستورلارى، تاۋار وندىرۋشىلەرى قاتىسپاق.

25 جىلدان بەرى كورمە ۇيىمداستىرۋمەن اينالىسىپ كەلە جاتقان مامان، "ExpoGroup" كومپانياسىنىڭ ديرەكتورى شولپان قوجابايەۆانىڭ ايتۋىنشا، اۋىل شارۋاشىلىعى سالاسى بويىنشا كەڭ اۋقىمدى كورمەلەر استانا جانە الماتى قالالارىندا عانا وتكىزىلگەن. ەندى ءۇشىنشى بولىپ تۇركىستان شاھارىندا ۇيىمداستىرىلماق.

"ءبىرىنشى حالىقارالىق "KazAgro/KazFood Turkistan" حالىقارالىق كورمە-جارمەڭكەسىن وتكىزۋگە تۇركىستان قالاسىن تاڭداۋىمىزدىڭ ءمانى بار. بىرىنشىدەن، تۇركىستاننىڭ تاريحى تەرەڭدە، ول – ۇلى جىبەك جولىنىڭ بويىنداعى ساۋدا ورتالىعى. تاريحي جانە تۋريستىك ورىندارى كوپ. ەكىنشىدەن، ناۋرىز مەرەكەسىن ۇيىمداستىرۋعا وسى ايماقتا اۋا رايى وتە قولايلى. ءقازىردىڭ وزىندە الىس-جاقىن شەت مەملەكەتتەر وسى كورمەگە قىزىعۋشىلىق تانىتىپ وتىر. بارلىق وبلىستان دا دەلەگاسيالار كەلەدى. ءىس-شارا اياسىندا اۋىل شارۋاشىلىعى بويىنشا شەتەل ينۆەستورلارى مەن كاسىپكەرلەرىمەن ىسكەرلىك كەزدەسۋلەر ۇيىمداستىرىلادى. قازاقستاننىڭ ۇزدىك قولونەرشىلەرى كەراميكادان، جۇننەن، تەمىردەن جانە شىنىدان بۇيىمدار جاساۋ، كىلەم توقۋ بويىنشا ءتۇرلى شەبەرلىك ساعاتتارىن وتكىزەدى. ۇلتتىق تاعامدار مەن كيىمدەرىمىز جۇرتشىلىق نازارىنا ۇسىنىلادى. اۋىل شارۋاشىلىعى، جىلىجاي شارۋاشىلىعى، ۆەتەريناريا، ساۋدا، كاسىپكەرلىك سالالارى بويىنشا دا ءتۇرلى كەلىسسوزدەر جۇرگىزىلىپ، ۇسىنىستار تالقىلانادى. شەتەلدەن جانە ەلىمىزدەن جۇزدەگەن وكىلدەردىڭ كەلۋى وڭىردە تۋريزم سالاسىن دامىتۋعا دا سەرپىن بەرمەدى. سەبەبى وڭىردەگى تاريحي ورىندار تۋرالى سۇراپ جاتقان شەتەلدىكتەر بار"، – دەيدى شولپان قوجابايەۆا.

كورمەگە الەمنىڭ جانە كورشىلەس ەلدەردىڭ تانىمال كومپانيالارى مەن اۋىل شارۋاشىلىعى تاۋارىن وندىرۋشىلەرى ۇزدىك ونىمدەرىن، تەحنيكالارىن اكەلەدى دەپ كۇتىلىپ وتىر. سۋسىندار، شىرىندار، سۋ، شاي، كوفە، تاعامدىق قوسپالار، تاماق جانە سۋسىن وندىرۋگە ارنالعان جابدىقتار، توڭازىتقىش، ساۋدا جانە قويما جابدىقتارى، اۋىل شارۋاشىلىعى تەحنيكاسى مەن جابدىقتارى جانە ولاردىڭ قوسالقى بولشەكتەرى جەتكىزىلەدى.