ناۋرىز – كوكتەم مەن جاڭارۋ مەرەكەسى. كۇن مەن ءتۇننىڭ تەڭەلىپ، جەر دۇنيەنىڭ قۇلپىراتىن شاعى.
مەرەكە قارساڭىندا الماتى قالاسى اكىمدىگى مەن ورتالىقتاندىرىلعان كىتاپحانالار جۇيەسىنىڭ ۇيىمداستىرۋىمەن ناۋرىز مەيرامى اياسىندا اقىن، حالىقارالىق «الاش» ادەبي سىيلىعىنىڭ لاۋرەاتى باقىت بەدەلحاننىڭ «ناۋرىزدا جالعىز تۋعام جوق!» اتتى شىعارماشىلىق ادەبي سازدى-دۋمانى وتكىزىلدى. بۇگىندە ءبۇتىن ەل ازاماتى، ەل اعاسى اتىنا ابدەن لايىق ۇلىن جۇرتى جاتسىنباي، جىلىشىرايمەن قابىلداپ، مارتەبەسىن اسىردى.
اۋەلەگەن ءان شىرقالىپ، جانعا ءنار بەرەتىن جىر وقىلىپ، تىڭدارمانداردى وزىنە ءتانتى ەتتى. دۋماننىڭ العاشقى ءسوزىن تۋعان كۇن يەسى باقىت بەدەلحان باستاپ، ءدال سول كۇنى قازاقتىڭ كلاسسيك جازۋشىسى عابيت مۇسىرەپوۆ، م.اۋەزوۆتىڭ الدىندا ءان سالعان جانىبەك كارمەنوۆتەردىڭ تۋعانىن اتاپ ءوتتى. ءارى قاراي ولەڭمەن ءوربىتىپ، ىنىلىك ىزەتپەن كەزەكتى ءسوزدى بەكجان تۇرىسقا تابىستادى. اكتەر اعالىق اق تىلەگىن ايتىپ، ىزگى نيەتىن ءبىلدىردى.
اقىننىڭ سوزىنە جازىلعان ليريكالىق تا رۋحتى اندەر تىڭدارمان كوڭىلىن كوككە جەتەلەپ، كوركەم يىرىمدەرمەن ەستە قالدى. ع.مۇسىرەپوۆ ايتقان «حاس سۇلۋدىڭ كوز جاسىنداي ءمولدىر ونەر» جولىنداعى اقىننىڭ قاجىرلى ەڭبەگى «تەمىرەن»، «اسىلتاس» تەاترلارىنىڭ اكتەرلەرى دايارلاعان كومپوزيسيالىق قويىلىمدارىنان كورىنىس تاپتى. كەش قوناقتارى سافۋان شايمەردەنوۆ، ماقسات جاۋتىكوۆ، روزا ءالقوجا، ايبەك مۇحامەتالى، جىگەر اۋىپبايەۆ، اسەت ەسجان، ساعىنىش سەنبى، گۇلجانات مۇحامەتجان حالىقتى مەرەكەمەن قۇتتىقتاپ، اسەم اندەرىمەن جۇرەك تەربەپ كەتتى. قۇدايدىڭ قۇتىنداي بوپ، ۇلىستىڭ ۇلى كۇنىمەن قاتار كەلگەن اتاۋلى كۇن قىستان امان شىققان حالىقتىڭ ارقاسىن كەڭگە جازىپ، مارە-سارە كۇيگە ءتۇسىرىپ، ءبىر قۋانتقان دۋمانعا ۇلاستى. ىرگەسى بۇزىلماعان ەلگە تىنىشتىق، ەل ەڭسەسىن تىكتەر ەرگە قۋات تىلەدىك! حالىق بوپ قۋانار قۋانىشىمىز كوپ بولعاي!