ناۋرىزباي اۋدانىنىڭ 35 مىڭ تۇرعىنى ماگيسترالدىق سۋ قۇبىرى مەن سورعى ستانسياسى سالىنعاننان كەيىن ساپالى سۋمەن قامتاماسىز ەتىلدى
2023 جىلى ناۋرىزباي اۋدانىنىڭ اۋماعىندا كاسكادتى سورعى ستانسياسىنىڭ قۇرىلىسى اياقتالدى. بۇل تۋرالى الماتىنىڭ وڭىرلىك كوممۋنيكاسيالار قىزمەتىنىڭ الاڭىندا ناۋرىزباي اۋدانىنىڭ اكىمى نازيرا توعىزبايەۆا مالىمدەدى، دەپ حابارلايدى اlmaty-akshamy.kz.
«سونداي - اق، «قارعالى» جانە «اقساي» سۋ سۇزگى ستانسيالارى سالىنىپ جاتىر. «قارعالى» ستانسياسىندا جۇمىس 85%-عا اياقتالعان. جوسپار بويىنشا 2023 جىلدىڭ سوڭىنا دەيىن ستانسيا ىسكە قوسىلادى. بۇل جوبانى ىسكە اسىرۋ 70 مىڭ تۇرعىندى ساپالى سۋمەن قامتاماسىز ەتەدى»، - دەدى ن. توعىزبايەۆا.
«اقساي» سۋ جيناعىشى بويىنشا قۇرىلىس جۇمىستارى 40% ورىندالدى. جوبانى ىسكە اسىرۋ مەرزىمى 2025 جىلعى جەلتوقسانعا دەيىن. قۇرىلىس جۇمىستارى اياقتالعاننان كەيىن 100 مىڭ تۇرعىن سۋمەن قامتاماسىز ەتىلەدى.
ناۋرىزباي اۋدانىنىڭ اكىمى نازيرا توعىزبايەۆا ءوز سوزىندە سۋ قۇبىرى جەلىلەرىن سالۋ بويىنشا جۇرگىزىلىپ جاتقان جۇمىستار تۋرالى دا اتاپ ءوتتى.
«وزدەرىڭىز بىلەتىندەي، ورتالىقسىزداندىرۋ اياسىندا ينجەنەرلىك جەلىلەردى سالۋ بويىنشا فۋنكسيالار اۋدان اكىمدىكتەرىنە اۋىستى. وسى جىلدىڭ سوڭىنا دەيىن ءتورت شاعىن اۋدان بويىنشا سۋمەن جابدىقتاۋ جانە كارىز جەلىلەرىنىڭ جوبالارى ودان ءارى ىسكە اسىرۋ ءۇشىن اۋدان اكىمدىگىنە بەرىلەتىن بولادى. وسىلايشا، 2025 جىلدىڭ سوڭىنا قاراي 335 كم سۋمەن جابدىقتاۋ جانە كارىز جەلىلەرى سالىنادى، سونداي - اق ناۋرىزباي اۋدانىن ساپالى جانە ۇزدىكسىز سۋمەن قامتاماسىز ەتۋ ماسەلەسى شەشىلەدى»، - دەپ قورىتىندىلادى ن. توعىزبايەۆا.