ناۋرىزباي اۋدانىندا قۇرىلىس ۇدەپ، تۇرعىنداردىڭ سانىنىڭ وسۋىنە بايلانىستى الەۋمەتتىك ينفراقۇرىلىم دا قوسا دامىپ جاتىر. جىلدىڭ سوڭىنا دەيىن قۇرامىس ىقشام اۋدانىندا ەكى ماڭىزدى نىسان – 1500 ورىندىق جاڭا مەكتەپ پەن 320 ورىندىق بالاباقشا پايدالانۋعا بەرىلمەك. ال 2026 جىلدىڭ مامىرىندا 500 ادامعا ارنالعان ەمدىك-دياگنوستيكالىق ورتالىعى بار ەمحانا دا سالىنىپ بىتەدى. وڭىرلىك كوممۋنيكاسيالار قىزمەتى ۇيىمداستىرعان پرەسس-ساپار كەزىندە ناۋرىزباي اۋدانىنىڭ اكىمى نازيرا توعىزبايەۆا وسى ءۇش نىسانداعى جۇمىس بارىسىن تانىستىردى.
«كەلەشەك مەكتەپ» ۇلتتىق جوباسى اياسىندا قۇرامىس ىقشام اۋدانىندا جاڭا مەكتەپتىڭ قۇرىلىسى ءجۇرىپ جاتىر. بۇل وقۋ ورنىندا 1500 وقۋشى ءبىلىم الادى. مەكتەپ قۇرىلىسى اۋدانداعى وقۋشى ورنىنىڭ تاپشىلىعىن ەسكەرە قولعا الىنعان، ويتكەنى 2024–2025 وقۋ جىلىندا شامامەن 5000 ورىن جەتىسپەيدى. ءقازىر اۋدان بويىنشا 32 مىڭنان استام بالا وقيتىن 12 مەملەكەتتىك مەكتەپ جۇمىس ىستەيدى. بۇل نىساننىڭ قۇرىلىس جۇمىستارى 2023 جىلدىڭ تامىز ايىندا باستالدى.
«BCN Group» كومپانياسىنىڭ ءبىرىنشى ۆيسە-پرەزيدەنتى تالعات جانسەيىتوۆتىڭ ايتۋىنشا، جۇمىستىڭ 95%-ى بىتكەن.
«قۇرىلىس الاڭى 2،3 گا، مەكتەپ №219 1500 ورىنعا ارنالعان. قۇرىلىس اياقتالىپ قالدى. جوبا قۇنى - 7،9 ملرد تەڭگە، قارجى 85% يگەرىلدى. 1-2 تامىزعا دەيىن قۇرىلىس-مونتاج جۇمىسى اياقتالىپ، كەيىن وتكىزەمىز ونى. پۋسكونالادكا جۇمىستارى 1-2 اپتاعا سوزىلادى، مۇندا جەلدەتۋ، سۋ قۇبىرى، كارىز، جىلىتۋ جۇيەلەرى مەن مەكتەپكە قاجەتتى جابدىقتار ورناتىلادى. مەكتەپتە ەكى ۇلكەن سپورت زال، ءۇش كىشى سپورت زال، حورەوگرافيا زالى، 325 ورىندىق اكت زالى مەن 365 ورىندىق اسحانا بولادى. نىساننىڭ جالپى اۋماعى 14 500 شارشى مەتر»، - دەپ اتاپ ءوتتى تالعات جانسەيىتوۆ.
الايدا، عيماراتقا اپارار جول ازىرگە بىتپەگەن. قالالىق موبيلدىلىك باسقارماسى جول سالۋعا جەلىدەگى جۇمىس اياقتالعاننان كەيىن كىرىسپەك. استانا كوشەسىنەن سەيدىمبەك كوشەسىنە دەيىن جول سالىپ، ورتالىق كوشەسىن اياقتاۋ قاجەت، مۇنداعى جەكە ۇيلەردى ساتىپ الىپ، بۇزاتىنىن بۇزادى. مەكتەپتىڭ ماڭىنداعى جاياۋ جۇرگىنشىلەر جولىنداعى گاز قۇبىرىن دا تەرەڭدەتپەك.
قۇرامىس ىقشام اۋدانىندا تاعى 320 ورىندىق بالاباقشا سالىنىپ جاتىر. 2025 جىلدىڭ مامىر ايىنىڭ سوڭىنا قاراي نىسان 65%-عا دايار بولعان. ىشكى ينجەنەرلىك جەلىلەر، شاتىر مەن ارلەۋ جۇمىستارى اياقتالىپ قالسا (70%)، قاسبەتى 50%-عا بىتكەن. ءقازىر اۋماقتى كوگالداندىرىپ، قورشاۋعا كىرىستى.
ءۇشىنشى نىسان، 500 كەلۋشىگە ارنالعان ەمدىك-دياگنوستيكالىق ورتالىعى بار ەمحانانىڭ قۇرىلىسى 2025 جىلدىڭ ناۋرىزىندا باستالعان. جوبا قۇنى 8،9 ملرد تەڭگە، ونىڭ 2،5 ملرد تەڭگەسى زاماندىق مەديسينالىق جابدىق ساتىپ الۋعا جۇمسالادى. قۇرىلىس 2026 جىلدىڭ مامىر ايىندا اياقتالماق. ەمحانا اشىلعاننان كەيىن، قۇرامىس ىقشام اۋدانىنىڭ تۇرعىندارى دارىگەردىڭ كومەگىنە جۇگىنۋ ءۇشىن الىسقا بارمايدى، بۇل №26 قالالىق ەمحاناعا تۇسەتىن سالماقتى دا ازايتادى.
«ماۋسىم ايىندا قۇرىلىسقا رۇقسات الىندى. ءبىر ايدىڭ ىشىندە دايارلىق پەن قازبا جۇمىسىن جۇرگىزىپ، ىرگەتاستىن ازىرلەدىك. ءقازىر ءۇش بلوكتىڭ قۇرىلىسى ءجۇرىپ جاتىر، الداعى ءبىر ايدا جۇمىس اياقتالادى. جوبا بويىنشا بەس بلوكتان تۇراتىن وسى زامانعى ەمحانا سالىنادى، وندا دارىگەرلىك قىزمەتتىڭ بارلىق ءتۇرى بولادى. مۇندا قابىلداۋ، جەدەل جاردەم ءبولىمى، ستاسيونار مەن تۇرعىنداردى قابىلدايتىن كابينەتتەر ورنالاسادى» - دەيدى «MIR-A Construction» كومپانياسىنىڭ باس ينجەنەرى ۆالەريي يلنيسكيي.
وسىلايشا، ناۋرىزباي اۋدانىنىڭ تۇرعىندارىنا ارناپ الداعى ءبىر جارىم جىل ىشىندە جاڭادان ءبىلىم بەرۋ مەن مەديسينا مەكەمەسى سالىنىپ، بۇل اۋداننىڭ قارقىندى الەۋمەتتىك ينفراقۇرىلىمىن ايتارلىقتاي جاقسارتپاق