بيىلعى ماۋسىم ايىندا شۇعىلا ىقشام اۋدانىندا ۇزىندىعى 370 مەتر بولاتىن وسى زامانعى جاياۋ جۇرگىنشىلەر ايماعىن قۇرۋ جۇمىسى باستالدى. بۇل جوبا قالالىق ينفراقۇرىلىمدى دامىتۋ مەن اۋدان تۇرعىندارىنىڭ ءومىر ساپاسىن جاقسارتۋعا ارنالعان ماڭىزدى قادام بولماق. وڭىرلىك كوممۋنيكاسيالار قىزمەتى ۇيىمداستىرعان پرەسس-تۋر بارىسىندا ناۋرىزباي اۋدانىنىڭ اكىمى نازيرا توعىزبايەۆا وسىلاي دەپ حابارلادى.
«شۇعىلا City» تۇرعىن ءۇي كەشەنىنىڭ اۋماعىندا جاياۋ جۇرگىنشىلەر ايماعىن سالۋ - اۋدانداعى اباتتاندىرۋدىڭ نەگىزگى ەلەمەنتىنىڭ ءبىرى. جاياۋ جۇرگىنشىلەر مەن سەرۋەندەۋگە ارنالعان ايماق قۇرۋدى كوزدەيتىن جوبادا 2000 م² الاڭدى الىپ جاتقان تروتۋار جولى مەن 1200 م² ۆەلوجول دا بولادى. سونىمەن قاتار، اۋماقتا بالالاردىڭ ويىن الاڭى، باسكەتبول الاڭى، ۆوركاۋت ايماعى مەن شاعىن امفيتەاتر ورناتىلادى.
««شۇعىلا City» تۇرعىن ءۇي كەشەنىندەگى ۇيلەر بىزگە مەملەكەتتىك باعدارلاما اياسىندا بەرىلدى. تۇرعىنداردىڭ جايلى ءومىر سۇرۋىنە جاعداي جاساۋ ءۇشىن ءبىز اۋماقتى اباتتاندىرىپ، سونىڭ ىشىندە جاياۋ جۇرگىنشىلەر ايماعىن قۇرۋدى دا قولعا الدىق. بۇلار جاڭا ۋربانيستيكالىق نىسانداردى اباتتاندىرۋ باعدارلاماسى اياسىندا ىستەلىپ جاتىر. بيىل «حالىق قاتىساتىن بيۋدجەت» باعدارلاماسىنا 2،5 ميلليارد تەڭگە ءبولىندى، بۇل 34 ءتۇرلى جوبانى جۇزەگە اسىرۋعا مۇمكىندىك بەرەدى. ولاردىڭ ىشىندەگى ەڭ اۋقىمدىسى - جاياۋ جۇرگىنشىلەر ايماعىن اباتتاندىرۋ، قۇرىلىس پەن مونتاجداۋ جۇمىسىنىڭ قۇنى 450 ميلليون تەڭگەنى قۇرايدى. ماقساتىمىز - بۇل ايماقتى ادامدارعا ىڭعايلى دا جايلى ەتىپ، تۇرعىنداردىڭ قاۋىپسىزدىگىن قامتاماسىز ەتۋ، سونداي-اق، ادامداردىڭ ءومىر سۇرۋىنە قولايلى قىلۋ»، - دەيدى اۋدان اكىمى نازيرا توعىزبايەۆا.
اباتتاندىرۋ بارىسىندا كوشە جيھازدارى مەن كىشى ساۋلەت نىساندارى ورناتىلىپ، اۆتوماتتاندىرىلعان سۋارۋ جۇيەسى مەن كوشەلەردى جارىقتاندىرۋ باعانالارى ورناتىلادى. قۇرىلىس جۇمىستارى قاراشا ايىنا دەيىن اياقتالىپ قالادى.
«جاسىل ايماقتىڭ جالپى اۋدانى 6320 م² بولادى، 198 م² جاڭا تروتۋار پليتكاسى توسەلەدى، سونداي-اق 85 م² سەمەنت-قۇم بورديۋرلارى قايتا جوندەلەدى. اۋلالاردا ويىن الاڭدارى از، سوندىقتان ىڭعايلى كەڭىستىك قۇرۋ ءۇشىن ويىن الاڭدارىن جابدىقتاماقپىز. ولار جاسقا قاراي بولىنەدى: 4-تەن 12 جاسقا دەيىنگى بالالارعا ارنالعان جەكە الاڭدار، سونداي-اق 12-16 جاس ارالىعىنداعى جاسوسپىرىمدەرگە ارنالعان الاڭدار قاراستىرىلاتىن بولادى. سونىمەن قاتار، ءبىز سەرۋەندەۋگە ارنالعان ايماق قۇرىپ، ادامداردىڭ ۋاقىتىن جايلى وتكىزۋىنە مۇمكىندىك جاسايمىز»، - دەپ اتاپ ءوتتى ناۋرىزباي اۋدانىنىڭ اكىمى نازيرا توعىزبايەۆا.
جاياۋ جۇرگىنشىلەر ايماعى 44 كوپقاباتتى تۇرعىن ۇيگە جاقىن ورنالاسىپ، 12 مىڭنان استام اۋدان تۇرعىندارىنىڭ ەركىن دەمالۋىنا جاعداي جاساماق.