قازىرگى تاڭدا بەس شاعىناۋداندا ۇزىندىعى 195 كم سۋ قۇبىرى جانە كاناليزاسيا جەلىلەرى تارتىلدى.
بۇگىن الماتى قالاسىنىڭ اكىمى ەربولات دوسايەۆ ناۋرىزباي اۋدانىنىڭ تۇرعىندارىمەن كەزدەسۋ وتكىزۋدە. جۇرتشىلىقپەن وتكەن جيىندا اۋدانداعى اۋىز سۋ، سۋ قۇبىرى، كاناليزاسيا جەلىلەرىن تارتۋ، سۋمەن قامتاماسىز ەتۋ ماسەلەلەرى كوتەرىلدى، دەپ حابارلايدى Almaty-akshamy.kz.
قالا باسشىسى ە.دوسايەۆتىڭ ايتۋىنشا، اقجار، تاۋسامالى، شۇعىلا 3 شاعىن اۋدانىندا قۇرىلىس ءجۇرىپ جاتىر، جوسپارلانعان 30 كم سۋ قۇبىرى جانە كاناليزاسيا جەلىلەرىنىڭ 19 كيللومەترى سالىندى. قالعان 11 كيللومەترى 2023 جىلدىڭ ماۋسىم ايىنا دەيىن اياقتالادى.
«سونداي-اق، 3 شاعىن اۋدان بويىنشا ۇزىندىعى 135 كم سۋ قۇبىرى جانە 132 كم كاناليزاسيا جەلىلەرىنىڭ جوبالاۋ-سمەتالىق قۇجاتتاماسى دايىندالۋدا. ياعني، "قاراعايلى" شاعىناۋدانىندا 25 كم سۋ قۇبىرى جانە22 كم كاناليزاسيا جەلىلەرى، "اقجار" شاعىناۋدانىندا 20 كم سۋ قۇبىرى جانە 20 كم كاناليزاسيا جەلىلەرى، "تاستىبۇلاق" شاعىناۋدانىندا 90 كم سۋ قۇبىرى جانە 90 كم كاناليزاسيا جەلىلەرى سالىنادى»، - دەدى قالا اكىمى ەربولات دوسايەۆ.
"اقجار" جانە "قاراعايلى" شاعىناۋداندارىنىڭ قۇجاتتارى جەلتوقسان ايىندا مەملەكەتتىك ساراپتامادان شىعادى، قۇرىلىسى 2023 جىلدىڭ 2ء-شى توقساندا باستالادى، ال "تاستىبۇلاق" بويىنشا ساراپتاماسى كەلەسى جىلدىڭ ناۋرىز ايىندا شىعادى، قۇرىلىسى ءىىى توقسانىندا باستالادى.
"اقجار" شاعىناۋدانىن سۋمەن قامتاماسىز ەتۋ ماسەلەسىن شەشۋ ءۇشىن وسى جازدا، اقساي سۇزگى ستانسياسىن سالۋ كەزىندە، مەن الماتىنىڭ جەر استى سۋ قورلارىنان سۋ تارتۋ ءۇشىن سورعى ستانسيالارى مەن ماگيسترالدىق سۋ قۇبىرىن سالۋ تۋرالى شەشىم قابىلدادىم»، - دەدى قالا باسشىسى.
الماتىنىڭ باتىس بولىگىن سۋمەن قامتاماسىز ەتۋ ءۇشىن «ۆيۆات» كومپانياسى جەلتوقسان ايىنا دەيىن ۇزىندىعى 34 كم باتىس كاناليزاسيا كوللەكتورىنىڭ جوبالاۋ-سمەتالىق قۇجاتتاماسىن اياقتاۋدى جوسپارلاپ وتىر. سودان كەيىن وسى جوبانى قارجىلاندىرۋ ماسەلەسى پىسىقتالادى (شامامەن قۇنى – 58 ملرد. تەڭگە).