ناۋرىزباي اۋدانىندا ەمحانالار جەتىسپەيدى

اسىرەسە، جوعارعى بولىگىندە ەمحانالاردىڭ جەتىسپەۋ ماسەلەسى وزەكتى بولىپ تۇر.

الماتى قالاسىنىڭ اكىمى ەربولات دوسايەۆ بۇگىن ناۋرىزباي اۋدانىنىڭ جۇرتشىلىعىمەن كەزدەستى. ونىڭ بارىسىندا اۋدانداعى دەنساۋلىق ساقتاۋ نىساندارىنىڭ جەتىسپەۋشىلىگى ماسەلەسى ايتىلدى، دەپ حابارلايدى Almaty-akshamy.kz.

اۋدان حالقىنىڭ جىل سايىن 10-12 مىڭ ادامعا وسەتىنىن ەسكەرە وتىرىپ، قالا اكىمدىگى 2 جاڭا ەمحانا (500 كەلۋشىگە ارنالعان)  جانە 1 وتباسى-دارىگەرلىك امبۋلاتوريا (200 كەلۋشىگە ارنالعان) سالۋدى جوسپارلاۋدا.

«بۇگىنگى كۇنى "قۇرامىس" شاعىناۋدانىندا 500 كەلۋشىگە ارنالعان ەمحانانىڭ جوبالاۋ-سمەتالىق قۇجاتتاماسى ازىرلەندى، 2023 جىلدىڭ قاڭتارىندا مەملەكەتتىك ساراپتامانىڭ وڭ قورىتىندىسىن الۋ، 2023 جىلدىڭ II توقسانىندا قۇرىلىس-مونتاجداۋ جۇمىستارىن باستاۋ جوسپارلانعان»، - دەدى قالا باسشىسى ەربولات دوسايەۆ. 

"شۇعىلا" شاعىناۋدانىندا 500 كەلۋشىگە ارنالعان جاڭا ەمحانا سالۋ ءۇشىن جەر ۋچاسكەسىن رەسىمدەۋ جانە جوبالاۋ-سمەتالىق قۇجاتتامانى ازىرلەۋگە كونكۋرس جاريالاۋ ءۇشىن قۇجاتتاما دايىندالۋدا.

«سونداي-اق، وسى جىلدىڭ سوڭىنا دەيىن "اقجار" شاعىناۋدانىندا 200 كەلۋشىگە ارنالعان 1 دارىگەرلىك امبۋلاتوريانىڭ جوبالاۋ-سمەتالىق قۇجاتتاماسىن ازىرلەۋ اياقتالادى، قازىرگى ۋاقىتتا ول مەملەكەتتىك ساراپتامانىڭ قاراۋىندا. قۇرىلىستى مەملەكەتتىك ساراپتامانىڭ وڭ قورىتىندىسىن الىپ، كونكۋرستىق پروسەدۋرالاردى وتكىزگەننەن كەيىن، 2023 جىلدىڭ II توقسانىندا باستاۋ جوسپارلانعان»، - دەدى قالا اكىمى ە.دوسايەۆ.