ناۋرىزباي اۋدانىندا كوشە-جول جەلىسىن قايتا جاڭارتۋ مەن قۇرىلىس جۇمىستارى جالعاسىپ جاتىر. الداعى ەكى جىلدا 100 شاقىرىم جول جاڭارتىلىپ، تروتۋارلار مەن ارىقتار سالىنىپ، اۋدانداعى كولىك بايلانىسى قالىپقا كەلمەك. وڭىرلىك كوممۋنيكاسيالار قىزمەتى ۇيىمداستىرعان باسپا ءسوز كونفەرەنسياسىندا اۋدان اكىمى نازيرا توعىزبايەۆا وسىلاي دەپ مالىمدەدى.
ناۋرىزباي اۋدانىندا جول ينفراقۇرىلىمىن دامىتۋ جوبالارى جۇيەلى تۇردە ىسكە اسىپ جاتىر. بىلتىر 21 كوشەدە 15 شاقىرىم جولعا ورتاشا جوندەۋ جۇرگىزىلىپ، وعان 1،1 ميلليارد تەڭگە بولىنگەن. 2025 جىلى تاعى 35 كوشەدە 47 شاقىرىم جولدى جاڭارتادى، وسى ماقساتقا 3،2 ميلليارد تەڭگە ءبولىندى.
وتكەن جىلى اقجار شاعىن اۋدانىندا 10 كوشەدە 6 شاقىرىم جاڭا جول سالىنىپ، جۇمىس قۇنى 400 ميلليون تەڭگە بولدى. 2025 جىلدىڭ مامىر ايىنان باستاپ اقجار مەن شۇعىلا شاعىن اۋداندارىندا جاڭا جول سالۋدى باستاپ، ينجەنەرلىك جەلىلەردىڭ قۇرىلىسى اياقتالدى.
2024 جىلى اۋداندىق جول جەلىسىنىڭ ساپاسىن ارتتىرۋ ءۇشىن 50 مىڭ شارشى مەتر جول جابىندىسى قايتا جوندەلىپ، 1،7 شاقىرىم ارىق جەلىسى سالىندى. 2025 جىلى بولىنگەن 850 ميلليون تەڭگەگە تاعى 45 مىڭ شارشى مەتر جول جابىندىسىن جوندەپ، 10 كوشەدە 4،5 شاقىرىم تروتۋار سالىپ، 4 كوشەدە 5 شاقىرىم بولاتىن ارىق تارتۋ جۇمىسى جوسپارلانعان.
«بىرىنشىدەن، اۋداننىڭ باسقا قالالىق جانە وبلىستىق ايماقتارمەن كولىك بايلانىسىن جاقسارتۋ باستى مىندەتىمىزدىڭ ءبىرى بولىپ قالدى. ۇلكەن جولدار سالۋدى قولعا الدىق. وسىلايشا، اباي داڭعىلىن سترويتەلنايا كوشەسىنەن التىن وردا كوشەسىنە دەيىن 600 مەترگە دەيىن كەڭەيتۋ جوباسى جۇزەگە اسىرىلىپ جاتىر. جوبا قۇنى – 3،5 ميلليارد تەڭگە. 73 جەر ۋچاسكەسىن ساتىپ الۋدى اياقتادىق، بيىل جىل سوڭىنا دەيىن قۇرىلىس جۇمىستارى تولىق بىتەدى»، - دەدى نازيرا توعىزبايەۆا.
سونداي-اق تولە بي مەن جۇبانوۆ كوشەسىندە ينجەنەرلىك جەلىلەردى كوشىرۋ مەن جەر ۋچاسكەلەرىن ساتىپ الۋ جۇمىسى ءجۇرىپ جاتىر. تولە بي كوشەسىندەگى 270 ۋچاسكەدەن 211ء-ى ساتىپ الىندى. قالعان ۋچاسكەلەر 2025 جىلعا دەيىن ساتىپ الىنىپ، بارلىق قۇرىلىس-مونتاج جۇمىستارى اياقتالادى. بۇل جوبانى ىسكە اسىرۋ ءۇشىن 19،2 ميلليارد تەڭگە ءبولىندى. جۇبانوۆ كوشەسىندە 346 ۋچاسكەنىڭ 75ء-ى ساتىپ الىندى، قالعانىن باعالاۋ جۇمىسى اياقتالىپ قالدى. بۇل جوبانى اياقتاۋ قۇنى 13،1 ميلليارد تەڭگە، 2026 جىلدىڭ قاراشا ايىنا جوسپارلانعان.
بارلىق قۇرىلىس پەن جولداردى جاڭالاۋ جۇمىستارىن جەر ۋچاسكەلەرىن ساتىپ الۋ مەن مەنشىك يەلەرىمەن كەلىسۋدى ەسكەرە وتىرىپ ىستەپ جاتىرمىز. جول جەلىسىن كەشەندى جاڭارتۋ كولىك قاتىناسىن ارتتىرىپ قانا قويماي، ناۋرىزباي اۋدانىنداعى تۇرعىنداردىڭ ءجۇرىپ-تۇرۋىن ىڭعايلى ءارى ءقاۋىپسىز ەتەدى.