جىل بويى ءوتىپ جاتقان «تازا قازاقستان» رەسپۋبليكالىق ەكولوگيالىق اكسياسى اياسىندا الماتىنىڭ ناۋرىزباي اۋدانىندا كوپتەگەن جۇمىستار اتقارىلىپ كەلەدى.
اتاپ ايتقاندا، «تازا قازاقستان» رەسپۋبليكالىق ەكولوگيالىق اكسياسى جانە «جاسىل اۋلا» باستاماسى اياسىندا «Alem City 3» تۇرعىن ءۇي كەشەنىندە 400 كومپەنساسيالىق اعاش وتىرعىزىلدى، دەپ حابارلايدى aqshamnews.kz.
بۇل شارا اۋدان اۋماعىن كوگالداندىرۋعا، ەكولوگيالىق جاعدايدى جاقسارتۋعا جانە جايلى ءارى جاسىل قالالىق ورتا قالىپتاستىرۋعا باعىتتالعان. سونىمەن قاتار، «شۇعىلا» تۇرعىن ءۇي كەشەنىندە سەنبىلىك ۇيىمداستىرىلىپ، ونىڭ اياسىندا ءشوپ شابۋ، قوقىس جيناۋ، تروتۋارلار مەن جولداردى سىپىرىپ، جۋۋ، سونداي-اق قۇرىلىس جۇمىستارىنان كەيىن قالعان تاستاردى شىعارۋ جۇمىستارى اتقارىلدى.
سونداي-اق، ناۋرىزباي اۋدانى «تازالىقتى بارلىعى باقىلايدى» چەللەندجىن تۇركسىب اۋدانى كاسىپكەرلەرىنەن قابىلداپ، اۋدان اۋماعىندا سەنبىلىك ۇيىمداستىردى. اۋدان اۋماعىن تازالاۋ بويىنشا ناتيجەلى جۇمىستان كەيىن ەستافەتا بوستاندىق اۋدانىنا جولداندى. ال وتكەن كۇندەرى «تازا قازاقستان» رەسپۋبليكالىق ەكولوگيالىق اكسياسى مەن «جارقىن كۇز» ەكواكسياسى اياسىندا «اقجار» شاعىناۋدانىندا جەرگىلىكتى سەنبىلىك ءوتتى. وعان بارلىعى 12 جۇمىسشى مەن 3 ارنايى تەحنيكا جۇمىلدىرىلدى.
جاز كەزىندە «الماتى – ءبارىمىزدىڭ ورتاق ءۇيىمىز» ەكولوگيالىق ناۋقانى اياسىندا ناۋرىزباي اۋدانىندا ءجيى سەنبىلىكتەر وتكەن بولاتىن. شىلدە ايىندا وتكەن اۋقىمدى سەنبىلىكتەردىڭ بىرىنە 170 ادام قاتىسىپ، ساق قورعاندارى ساياباعىن قوسا العاندا، 4 گەكتار اۋماققا 200 اعاش وتىرعىزىلدى. بارلىعى اۋدان بويىنشا بۇگىنگە دەيىن 5000 اعاش وتىرعىزىلسا، ونىڭ 4000-ى وتەمدىك، ال 1000-ى باستاماشىلدىق نەگىزدە بولدى.
سونىمەن قاتار، «بارلىق» بازارىنىڭ الدىندا بۇرىن بوس جاتقان اۋماقتى اباتتاندىرۋ جۇمىستارى جۇرگىزىلە باستادى. «مۇندا بەي-بەرەكەت ساۋدانىڭ الدىن الۋ ءۇشىن قورشاۋلار ورناتىلىپ، اعاشتار مەن بۇتالار وتىرعىزىلادى، جانە اۆتوماتتاندىرىلعان سۋارۋ جۇيەسى ورناتىلادى»، – دەپ جازدى الەۋمەتتىك جەلىدە ناۋرىزباي اۋدانىنىڭ اكىمى نازيرا توعىزبايەۆا.
ايتا كەتكەن ءجون، ناۋرىزباي اۋدانىندا قوقىس الاڭدارى مەن جاشىكتەردى جۋۋ جانە زالالسىزداندىرۋ جۇمىستارى اپتا سايىن جۇرگىزىلىپ كەلەدى. بۇل جۇمىستار سانيتارلىق جاعدايدى جاقسارتۋعا جانە قوعامدىق ورىنداردا تازالىقتى ساقتاۋعا باعىتتالعان. بەكىتىلگەن كەستە بويىنشا قوقىس الاڭدارى اپتاسىنا ءبىر رەت جۋىلادى. الايدا، جازدىگۇنى تازالاۋ جيىلىگى 2-3 رەتكە دەيىن ارتتى. مۇنداي شارالار جاعىمسىز ءيىس پەن لاستانۋدىڭ الدىن الۋعا مۇمكىندىك بەردى.
قازىرگى ۋاقىتتا اۋدان اكىمدىگى قىس كەزىندەگى تازالىققا دا دايىن ەكەنىن حابارلادى. اكىمدىك مالىمەتىنشە، اۋدان اۋماعىن قاردان تازالاۋ جۇمىستارىنا ءۇش مەردىگەر ۇيىم جاۋاپتى. قاجەتتى ماتەريالدار، سونىڭ ىشىندە 8000 توننا قۇم مەن تۇز، ارنايى تەحنيكالار الىنعان. ال وتكەن كۇندەرى قارلى اۋا-رايى كەزىندە تازالاۋ جۇمىستارىنا 38 بىرلىك ارنايى تەحنيكا جانە 36 جول جۇمىسشىسى جۇمىلدىرىلىپ، 137 توننا قوسپا جانە 32 توننا تۇز پايدالانىلدى.