الماتىداعى ماحاتما گاندي ساياباعى جوندەۋدەن كەيىن ادام تانىماستاي وزگەرىپ سالا بەردى. بۇگىندە ساياباق ماڭايدا تۇراتىن الماتىلىقتاردىڭ، اسىرەسە، زەينەتكەرلەر مەن جاس انالاردىڭ، سونىمەن قاتار ستۋدەنتتەردىڭ سۇيىكتى دەمالىس ورنىنا اينالعان.
المالى اۋدانى اكىمدىگىنىڭ حابارلاۋىنشا، وتكەن جىلى گاندي اتىنداعى ساياباقتا قايتا جوندەۋ جۇمىستارى جۇرگىزىلگەن. جاياۋ جۇرگىنشىلەر ايماعىنىڭ بويىندا ىڭعايلى دەمالۋ ءۇشىن اتكەنشەكتەر، ورىندىقتار قويىلعان. اشىق اۋادا اۋەسقويلار ءۇشىن شاتىر استىنداعى ترەناجەرلارمەن ءبىرىنشى دارەجەلى ايماق جاسالدى. ول جەردە كەز-كەلگەن اۋا-رايىندا سپورتپەن اينالىسۋعا بولادى. تەننيس ويناۋعا ارنالعان ۇستەلدەر، ىڭعايلى جۇگىرۋ جولدارى بار. جاياۋ جۇرگىنشىلەر جولدارى اسفالتتالىپ، كەڭەيتىلدى. شاحمات نەمەسە ۇستەل ويىندارىن ءستيلدى جاڭا جارىقتاندىرىلعان ۇيشىكتەردە ويناۋعا بولادى. كىشكەنتاي بالالارعا ارنالعان ويىن الاڭى سالىندى. ساياباقتىڭ ورتاسىندا، گاندي ەسكەرتكىشىنىڭ جانىندا برۋسچاتكا تولىعىمەن جاڭارتىلدى. ساياباق جاڭارىپ، جاقسارعاننان كەيىن مۇندا دەمالۋعا كەلۋشىلەردىڭ سانى ارتا تۇسكەن. بۇگىندە پارككە كۇن سايىن شامامەن ەكى مىڭنان استام ادام كەلەدى.
ايتا كەتەيىك، م.گاندي اتىنداعى ساياباعىن اباتتاندىرۋ جۇرىستارى ءبىر اي ىشىندە «حالىق قاتىساتىن بيۋدجەت» باعدارلاماسى اياسىندا جۇرگىزىلدى. جاڭعىرتۋ جۇمىستارىنا جەرگىلىكتى بيۋدجەتتەن 200 ملن تەڭگە قاراجات بولىنگەن.
جاڭارعان دەمالىس ايماعىن كورۋگە بارعان تىلشىلەردىڭ نازارىنا اتكەنشەكتەردە بالالارىن ويناتىپ جۇرگەن اجەي انادايدان كوزگە ءتۇستى. ءوزىن اعايشا دەپ تانىستىرعان اجەي نەمەرەسىن ويناتىپ ءجۇر ەكەن.
– وي، اينالايىندار، مىنا ساياباق جاننىڭ راحاتى بولدى. كەلىن-بالا جاس، جۇمىستارىن ىستەسىن. مەن مىنە، نەمەرەمدى ءوزىم قارايمىن. ساياباقتى جوندەگەلى بەرى وسى جەردەن شىقپايمىز. مۇندا بارلىعى بار. ءوزىم دە دەمالامىن، نەمەرەمە دە قىزىق. كەيدە ءوزىم قاتارلى جاندارمەن وتىرىپ اڭگىمە-دۇكەن قۇرامىز. زەرىكپەيسىڭ دەگەنىم عوي. ساياباقتى زامانىنا قاراي، تاماشا جاساپتى. بارلىق جاعداي بار مۇندا. بىزگە بۇدان ارتىق نە كەرەك دەيسىڭ، قاراعىم. ەڭبەكتەرىڭ جەمىستى بولسىن! الماتىمىز كوركەيە بەرسىن! – دەيدى اعايشا اجەي.
ءسال جۇرگەنىمىزدە ورىندىقتا وتىرعان ءبىر توپ جاستى كەزدەستىردىك. ولار دا ساياباقتىڭ قالا تۇرعىندارىنا، اسىرەسە جاستار ءۇشىن قولايلى جاسالعانىن جارىسا ايتىپ بەردى.
– ساياباقتا جاستار ءۇشىن دە جاعداي جاسالعان ەكەن. كەيدە ساباقتان بوس ۋاقىتىمىزدا قايدا بارارىمىزدى بىلمەي كەتەتىنىمىز بار. مىنا جەر قۇددى ءبىر ءبىز ءۇشىن جاسالعانداي. ۇساق-تۇيەككە دەيىن ءمان بەرىلىپتى. بىرنەشە جەردە بيوتۋالەت ورناتىلىپتى. ول دا ماسەلە عوي، ايتپەسە. ءبىر بايقاعانىمىز، مۇندا تازالىق پەن تارتىپكە قاتتى ءمان بەرىلگەن. جۇمىسشىلار جەرگە جاپىراق تۇسىرمەي جيناپ الىپ وتىرادى ەكەن. قاراڭىزشى، اينالامىز تاپ-تازا! مۇنداي جەردە ءومىر ءسۇرۋدىڭ ءوزى باقىت قوي!
ايتا كەتەيىك، م.گاندي اتىنداعى ساياباق حح عاسىردىڭ 70-جىلدارىنىڭ باسىندا سالىنعان. 2003 جىلدىڭ قازان ايىندا ساياباقتىڭ شىعىس بولىگىندە ءۇندى حالقىنىڭ ساياسي جانە قوعام قايراتكەرى ماحاتما گانديگە ەسكەرتكىش قويىلعان. كەيىن ەسكەرتكىش ورناتىلعاننان سوڭ ساياباق سول تۇلعانىڭ قۇرمەتىنە وراي قازىرگى اتاۋىن العان.