قازىرگى تاڭدا ءبىلىم جەكە تۇلعانىڭ كاسىبي دامۋىن عانا ەمەس، ونىڭ دۇنيەتانىمى مەن قورشاعان الەمگە كوزقاراسىن قالىپتاستىراتىن ماڭىزدى قۇرالعا اينالدى.
وسى تۇرعىدا ۇلتتىق قۇندىلىقتاردى ساقتاۋ مەن ناسيحاتتاۋ ەرەكشە ماڭىزعا يە. حالىقتىڭ مادەني مۇراسى، سالت-داستۇرلەرى مەن نانىم-سەنىمدەرى وسكەلەڭ ۇرپاققا رۋحاني تاربيە بەرۋدىڭ نەگىزى بولۋى ءتيىس. ۇلتتىق قۇندىلىقتاردى دارىپتەۋ ارقىلى جاستاردىڭ ءوز مادەنيەتى مەن تاريحىنا دەگەن قۇرمەتى ارتىپ، ولاردىڭ قوعامداعى ورنى ايقىندالادى.
مۇحتار شاحانوۆ ءوزىنىڭ «ءتورت انا» ولەڭىندە:
تۋعان جەرى – ءتۇپ قازىعى، ايبىنى،
تۋعان ءتىلى – ماڭگى ونەگە ايدىنى،
جان بايلىعى، ءسالت-داستۇرى – تىرەگى،
قادامىنا شۋاق شاشار ۇنەمى.
دەپ جىرلاعانداي، ۇلتتىق رۋحتا تاربيەلەنگەن بالالار تۋعان جەرىن قادىرلەپ، ءوز مادەنيەتىنە قۇرمەتپەن قارايتىن ازامات بولىپ قالىپتاسادى.
ۇلتتىق قۇندىلىقتاردى ناسيحاتتاۋ – جاھاندانۋ جاعدايىندا حالىقتىڭ بىرەگەيلىگىن ساقتاۋدىڭ ماڭىزدى شارتتارىنىڭ ءبىرى. بۇل ءۇردىس مادەني ارتۇرلىلىكتى قۇرمەتتەۋ قاعيداتتارىنا قايشى كەلمەي، تولەرانتتىلىق پەن ءوزارا سىيلاستىق نەگىزىندە جۇزەگە اسىرىلۋى ءتيىس. قازاقستاندا بارلىق ەتنوستاردىڭ ءبىر شاڭىراق استىندا ءتاتۋ-تاتتى ءومىر ءسۇرۋى قازاقستاندىق پاتريوتيزم يدەياسىن نىعايتۋدىڭ جارقىن ۇلگىسى بولىپ تابىلادى.
وسى ماقساتتا الماتى قالاسى ءبىلىم باسقارماسىنا قاراستى №19 جالپى ءبىلىم بەرەتىن مەكتەپتە 14 ناۋرىز – كورىسۋ كۇنىنە ارنالعان مەرەكەلىك شارا ءوتتى. ۇلىستىڭ ۇلى كۇنى – ناۋرىز مەيرامىنىڭ باستاۋى سانالاتىن امال مەرەكەسى مەكتەپ ۇجىمى مەن «مەدەۋ اۋدانىنىڭ بەلسەندى ۇزاق ءومىر ءسۇرۋ ورتالىعى» وكىلدەرىنىڭ قاتىسۋىمەن اتاپ ءوتىلدى.
ءىس-شاراعا اۋدانىمىزدىڭ ومىرگە قۇشتار قارتتارى ارنايى شاقىرىلىپ، ولار وقۋشىلارعا ونەگەلى ءومىر جولدارى تۋرالى اڭگىمەلەپ، اق باتالارىن بەردى. ارداگەرلەر تاعدىردىڭ ءتۇرلى سىناعىنا قاراماستان، ومىرلىك ۇستانىمدارىن جوعالتپاي، كەيىنگى بۋىنعا ۇلگى بولارلىق عۇمىر كەشكەنىن تەبىرەنىسپەن جەتكىزدى. وقۋشىلار دا ءوز تاراپىنان ۇلكەندەرگە قۇرمەت كورسەتىپ، جىلى لەبىزدەرى مەن شىنايى ىقىلاستارىن ءبىلدىردى.
پاتريوتتىق تاربيەنى قالىپتاستىرۋ ەڭ الدىمەن مەكتەپ قابىرعاسىنان باستالادى. بالالاردىڭ بويىنا تۋعان جەرگە دەگەن سۇيىسپەنشىلىكتى ءسىڭىرۋ – ءاربىر ۇستازدىڭ مىندەتى. ۇلتتىق قۇندىلىقتاردى ناسيحاتتاۋ ارقىلى مادەني مۇرانىڭ ساقتالۋىنا ىقپال ەتىپ، جاستاردى ءوز تاريحى مەن مادەنيەتىنە قۇرمەتپەن قاراۋعا باۋلۋ – باستى ماقساتىمىز.
ءبىلىم بەرۋ جۇيەسىنە ۇلتتىق قۇندىلىقتاردى ەنگىزۋ – قوعامنىڭ تۇراقتى دامۋىنا، ازاماتتىق جاۋاپكەرشىلىكتى قالىپتاستىرۋعا جانە جاھاندىق وركەنيەتپەن ۇيلەسىمدىلىككە جەتۋگە مۇمكىندىك بەرەدى. بۇل ۇستانىمدى ساقتاۋ ارقىلى عانا ءبىز ءوز بىرەگەيلىگىمىزدى ساقتاپ، ەلدىڭ بولاشاق دامۋىنا وڭ ۇلەس قوسا الامىز.
كالدىبەكوۆا ايناش اكىلبەكوۆنا
№19 جالپى ءبىلىم بەرەتىن مەكتەپ
باسشىسىنىڭ ءبىرىنشى ساناتتى ورىنباسارى