قىرعىز، تۇرىكمەنستان، يران پرەزيدەنتتەرى قازاقستاندىقتاردى ناۋرىز مەيرامىمەن قۇتتىقتادى.
ناۋرىز مەرەكەسىنە وراي قاسىم-جومارت توقايەۆتىڭ اتىنا شەت مەملەكەتتەردىڭ باسشىلارىنان، حالىقارالىق ۇيىمداردىڭ جەتەكشىلەرىنەن قۇتتىقتاۋ جەدەلحاتتارى ءالى دە كەلىپ ءتۇسىپ جاتىر، دەپ حابارلايدى Almaty-akshamy.kz اقوردا سايتىنا سىلتەمە جاساپ.
قىرعىز رەسپۋبليكاسىنىڭ پرەزيدەنتى سادىر جاپاروۆ ءوز قۇتتىقتاۋىندا ورتاق مۇرامىز ءارى جىل باسى سانالاتىن ناۋرىز مەيرامىن بابالارىمىزدىڭ ىزگى نيەتپەن جانە ۇلكەن ۇمىتپەن تويلاعانىن جازعان.
«كوكتەمنىڭ وسىناۋ مەرەكەسى باۋىرلاس ەكى حالىقتىڭ دامىپ، وركەندەۋىنە اقجولتاي بولسىن. قىرعىزستان مەن قازاقستان اراسىنداعى ورتاق رۋحاني قۇندىلىقتارعا، دوستىققا جانە ستراتەگيالىق سەرىكتەستىككە نەگىزدەلگەن كوپجاقتى قاتىناستاردى ودان ءارى دامىتۋ ءۇشىن سىزبەن ىنتىماقتاستىقتا جۇمىس ىستەيمىز دەپ ۇمىتتەنەمىن»، – دەلىنگەن جەدەلحاتتا.
تۇرىكمەنستان پرەزيدەنتى سەردار بەردىمۇحامەدوۆ تە مەملەكەت باسشىسى مەن باۋىرلاس قازاقستان حالقىنا ءوزىنىڭ قۇتتىقتاۋى مەن ىزگى تىلەگىن جولدادى.
«ناۋرىز مەيرامى ەجەلدەن تابيعاتتىڭ، تىرشىلىكتىڭ قايتا تۇلەپ، كوكتەمنىڭ كەلگەنىن بىلدىرەدى. بۇل مەرەكە قوناقجايلىق، بەيبىتبىشىلىك، تاتۋ كورشىلىك جانە گۋمانيزمنىڭ بيىك قاعيداتتارىنا نەگىزدەلگەن ءداستۇردى ۇشتاستىرادى. سوندىقتان ونىڭ حالىقتار اراسىنداعى بىرلىك پەن دوستىقتى نىعايتۋداعى ماڭىزى ەرەكشە. وسىناۋ بىرەگەي مەيرام سىزگە، بارشا قازاقستان حالقىنا قۋانىش، اماندىق، باق-بەرەكە اكەلسىن»، – دەپ جازعان تۇرىكمەنستان پرەزيدەنتى.
يران يسلام رەسپۋبليكاسىنىڭ پرەزيدەنتى يبراحيم رايسي قۇتتىقتاۋ جەدەلحاتىندا ناۋرىز مەيرامى ازاماتتارىمىزدىڭ جۇرەكتەرىنە قۋانىش سىيلاپ، ايماقتاعى بارلىق حالىققا بەيبىتشىلىك پەن ىنتىماق الىپ كەلسىن دەپ جۇرەكجاردى تىلەگىن جازعان.
«يران يسلام رەسپۋبليكاسى وسى مادەني ىنتىماقتاستىقتى، بەيبىتشىلىك پەن تىنىشتىقتى بۇكىل الەمگە جايۋ جانە نىعايتۋ ءىسىن قولدايدى. سونداي-اق بۇل ماقساتقا قول جەتكىزۋ ءۇشىن بارلىق ەلگە دوستىق قولىن سوزۋعا دايىن»، – دەلىنگەن يران پرەزيدەنتىنىڭ جەدەلحاتىندا.
سونىمەن قاتار وزدەرىنىڭ قۇتتىقتاۋ جەدەلحاتتارىن تۇركى مەملەكەتتەرى ۇيىمى اقساقالدار كەڭەسىنىڭ ءتوراعاسى بينالي يىلدىرىم، تۇركىتىلدەس ەلدەرى پارلامەنتتىك اسسامبلەياسىنىڭ باس حاتشىسى مەحمەت سۋرەيا ەر، تۇرىكسوي-دىڭ باس حاتشىسى دۇيسەن قاسەيىنوۆ، ەۋرازيالىق ەكونوميكالىق كوميسسيا القاسىنىڭ ءتوراعاسى ميحايل مياسنيكوۆيچ، ۇجىمدىق قاۋىپسىزدىك تۋرالى شارت ۇيىمىنىڭ باس حاتشىسى ستانيسلاۆ زاس، ەۋروپاداعى قاۋىپسىزدىك جانە ىنتىماقتاستىق ۇيىمىنىڭ از ۇلتتار ىستەرى جونىندەگى جوعارعى كوميسسارى قايرات ابدراحمانوۆ، ازياداعى ءوزارا ءىس-قيمىل جانە سەنىم شارالارى جونىندەگى كەڭەس حاتشىلىعىنىڭ اتقارۋشى ديرەكتورى قايرات سارىباي، تاتارستان پرەزيدەنتى رۋستام ميننيحانوۆ جانە باسقالار جولدادى.