ۆەيپتەر مەن شەگىلمەيتىن تەمەكى ونىمدەرىن اكەلۋ، ءوندىرۋ، ساتۋ جانە تاراتۋ ءۇشىن قىلمىستىق جاۋاپكەرشىلىكتى ەنگىزۋ تۋرالى زاڭ جوباسى پارلامەنت قاراۋىندا.
ءىىم شەگىلمەيتىن تەمەكى ونىمدەرىن زاڭسىز ساتۋ مەن تاراتۋ ءۇشىن جاۋاپكەرشىلىك بارىن ەسكە سالدى، – دەپ حابارلايدى اlmaty-akshamy.kz Polisia.kz-كە سىلتەمە جاساپ.
ءىىم رەسمي وكىلى شىڭعىس الەكەشيەۆتىڭ ايتۋىنشا، «زاڭ مەن ءتارتىپ» قاعيداتىن قامتاماسىز ەتۋ ماقساتىندا ىشكى ىستەر ورگاندارى قوعاممەن بىرلەسىپ، 18-31 ناۋرىز ارالىعىندا رەسپۋبليكالىق جەدەل-پروفيلاكتيكالىق ءىس-شاراسىن وتكىزەدى. اكسيا بارىسىندا حالىققا ناسىبايدى تۇتىنۋدىڭ زاردابى جانە كاسىپكەرلەرگە ونى ساتۋعا جول بەرمەۋ تۋرالى قۇقىقتىق ءتۇسىندىرۋ جۇمىستارى جۇرگىزىلەتىن بولادى.
«قازىرگى ۋاقىتتا «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسىندە شەگىلمەيتىن تەمەكى ونىمدەرىن، ونىڭ ىشىندە ناسىبايدى اكەلۋگە، وندىرۋگە، ساتۋعا جانە تاراتۋعا تىيىم سالۋ كوزدەلگەن. شەگىلمەيتىن تەمەكى ونىمدەرىن زاڭسىز ساتقانى ءۇشىن 25 اەك نەمەسە 92 مىڭ تەڭگەدەن استام مولشەردە ايىپپۇل كوزدەلگەن»، – دەدى شىڭعىس الەكەشيەۆ.
ساۋدا ەرەجەلەرىن بۇزۋ فاكتىلەرى انىقتالعان جاعدايدا كىنالى تۇلعالار جاۋاپقا تارتىلاتىن بولادى.
«ۆەيپتەر مەن شەگىلمەيتىن تەمەكى ونىمدەرىن اكەلۋ، ءوندىرۋ، ساتۋ جانە تاراتۋ ءۇشىن قىلمىستىق جاۋاپكەرشىلىكتى ەنگىزۋ تۋرالى زاڭ جوباسى قازاقستان رەسپۋبليكاسى پارلامەنتىنىڭ قاراۋىندا ەكەنىنە نازار اۋدارامىن. قۇرمەتتى ازاماتتار، اتالعان شارا ءبىرىنشى كەزەكتە ۇلت بولاشاعى – جاستاردىڭ دەنساۋلىعىن ساقتاۋعا باعىتتالعان»، – دەدى دەپارتامەنت باستىعى، ءىىم رەسمي وكىلى.
ەسكە سالايىق، 15 ناۋرىزدا اتىراۋدا وتكەن ۇلتتىق قۇرىلتايدىڭ ءۇشىنشى وتىرىسىندا پرەزيدەنت قاسىم-جومارت توقايەۆ ءسوز سويلەدى. مەملەكەت باسشىسى قازاقستاندىقتاردىڭ دەنساۋلىعىنا زيان كەلتىرەتىن ەسىرتكى مەن باسقا دا زاتتاردىڭ، سونىڭ ىشىندە ناسىبايدىڭ زيانى تۋرالى ايتتى.