ون جىلدان سوڭ ايەلدەر سانى ازايادى

عالىمدار الداعى 10 جىلدا كۇللى الەم بويىنشا دۇنيەگە كەلەتىن قىزدار قاراسى 4،7 ملن-عا ازاياتىنىن العا تارتىپ وتىر.

عالىمداردىڭ ايتۋىنشا، بۇل قۇبىلىس ۇل بالاعا ارتىقشىلىق بەرۋمەن بايلانىستى، دالىرەگى، ۇل بالانى ارتىق كورەتىن جاڭساق كوزقاراسپەن بايلانىستى.

بۇل باعىتتا حالىقارالىق دەڭگەيدە جاساقتالعان عالىمدار توبى سوڭعى 50 جىلدا تۋعان 3 ملرد بالانىڭ دەرەكتەرىن ساراپتامادان وتكىزگەن ەكەن. اتاپ ايتقاندا، زەرتتەۋشىلەر 1970 جىلدان بەرى ەرلەر مەن ايەلدەردىڭ اراقاتىناسى ۇلعايعان 12 ەلدىڭ، سونداي-اق، الەۋمەتتىك نەمەسە مادەني تەندەنسيالار ارقىلى اراقاتىناسى ارتۋى مۇمكىن 17 ەلدىڭ تۋۋ كورسەتكىشتەرىن تالدادى، دەپ حابارلايدى Almaty-akshamy.kz Islam.kz-كە سىلتەمە جاساپ. 

ستاتيستيكالىق دەرەكتەرگە نەگىزدەلىپ ازىرلەنگەن سەنارييلەردىڭ بىرىنە سايكەس 2030 جىلعا قاراي بۇل ەلدەردە 4،7 ميلليون قىز كەم دۇنيەگە كەلەدى. ەكىنشى سەناريي بويىنشا وسى كۇنگى قالىپتاسقان تەندەنسيالار ساقتالسا، بۇل كورسەتكىش 2100 جىلعا قاراي الەم بويىنشا 22 ميلليوننان اسۋى مۇمكىن. زەرتتەۋ اۆتورلارى ەرلەر سانى ارتقان سايىن قوعامدا زورلىق-زومبىلىق سەكىلدى جات ادەتتەردىڭ كوبەيۋىنە اكەلۋى مۇمكىن ەكەنىن ەسكەرتتى. سونىڭ ىشىندە سوڭعى 40 جىلدا ەۋروپانىڭ وڭتۇستىك-شىعىس  ەلدەرىندە، سونداي-اق، ازيانىڭ وڭتۇستىگى مەن شىعىسىنداعى ەلدەردە بەي-بەرەكەت جىنىستىق قاتىناسقا بايلانىستى تۇسىك جاساتقاندار قاراسى كۇرت ارتىپ كەلەدى.