استانادا ناسىباي وندىرەتىن جەراستى سەحى جويىلدى.
استانادا قۇقىق قورعاۋ ورگاندارىنىڭ قىزمەتكەرلەرى رەيد بارىسىندا 2 توننادان اسا ناسىباي ءونىمىن تاركىلەگەن، دەپ حابارلايدى Almaty-akshamy.kz.
پوليسيا دەپارتامەنتىنىڭ قىزمەتكەرلەرى اۋدان اكىمدىكتەرىمەن بىرلەسىپ، شەگىلمەيتىن تەمەكى ونىمدەرىن ساتۋدىڭ 70-كە جۋىق دەرەگىن، ونىڭ ىشىندە ناسىباي ءوندىرىسى بويىنشا جەراستى سەحتارىن انىقتاعان.
"رەيد بارىسىندا بايقوڭىر اۋدانىندا پوليسيا قىزمەتكەرلەرى ناسىباي وندىرەتىن سەحتى تاپتى. تاركىلەنگەن زاڭسىز ءونىمنىڭ جالپى سوماسى 10 ميلليون تەڭگەدەن اسادى. استانا پوليسيا دەپارتامەنتىنىڭ قىزمەتكەرلەرى رەيد بارىسىندا وماروۆ جانە اسان قايعى كوشەلەرىنىڭ قيىلىسىنداعى جەكە ۇيدە 2 توننا ناسىباي ساقتالعانىن انىقتادى. ناتيجەسىندە زاڭبۇزۋشىلارعا 25 ايلىق ەسەپتىك كورسەتكىش (اەك) مولشەرىندە ايىپپۇل سالۋ تۇرىندە اكىمشىلىك قۇقىق بۇزۋشىلىق تۋرالى كودەكستىڭ (اقبتك) 196-بابىنا سايكەس اكىمشىلىك جاۋاپكەرشىلىككە تارتىلدى"، - دەلىنگەن حابارلامادا.