جۋىردا وتكەن ۇلتتىق قۇرىلتايدىڭ ءۇشىنشى وتىرىسى قوعامداعى ماڭىزدى وقيعا بولعانى راس. داستۇرگە اينالعان وسى كەڭەس بارىسىندا قوعامدا اتقارىلار اۋقىمدى ىستەردىڭ باعىت-باعدارى ايقىندالدى. مۇنداي باسقوسۋدىڭ قازىرگىدەي جاھاندانۋ كەزەڭىندە ۇلتتىڭ وزىندىك كەلبەتىن ساقتاۋ قالۋ ءۇشىن اسا ماڭىزدى ءىس ەكەنى بەلگىلى. قوعامنىڭ دامىپ، وركەنيەتتى ەلدەردىڭ قاتارىنا قوسىلۋى ءۇشىن ەكونوميكالىق جەتىستىكتەر، حالىقتىڭ ۇلتتىق قۇندىلىقتارى قاجەت. پرەزيدەنتىمىز قوعامداعى بەرەكە-بىرلىكتى ساقتاۋ ەڭ نەگىزگى مىندەتتەردىڭ ءبىرى ەكەنىنە توقتالىپ، وسى ىستە زيالى قاۋىمعا ايرىقشا جاۋاپكەرشىلىك جۇكتەلەتىنىن جەتكىزدى. قۇرىلتايدا مەملەكەتتىك تىلگە قاتىستى ماسەلە دە باستى نازاردا بولدى. پرەزيدەنتىمىز قازاق ءتىلىنىڭ عىلىم تىلىنە اينالىپ كەلە جاتقانىن ءارى ول مەملەكەتتىك ساياساتتىڭ باستى باعىتى بولىپ قالاتىنىن ناقتىلادى. بۇل ىستە كرەاتيۆتى يندۋستريانىڭ ماڭىزى ەرەكشە. وسىعان وراي الداعى ۋاقىتتا اتالعان سالاداعى كەشەندى جۇمىستار جالعاسا بەرەتىن بولدى. قازاق ءتىلى بيزنەستىڭ، عىلىم مەن تەحنيكانىڭ تىلىنە اينالا باستادى،-دەدى مەملەكەت باسشىسى.
ەندى ەلدىڭ يدەولوگيالىق دامۋىندا مادەني مۇرانى ساقتاۋ، ءتول تاريحىمىز بەن كورنەكتى تۇلعالارىمىزدى دارىپتەۋ ءىسى دە باسىمدىققا يە بولماق. سول سەبەپتى بيىل جوشى ۇلىسىنىڭ نەگىزى قالانعانىنا 800 جىل تولعانى نازارعا الىپ، التىن وردا مارتەبەسىن لايىقتى دارىپتەۋ قاجەتتىلىگى ايتىلدى.
«ءبىز بولاشاققا سەنىممەن قادام باسۋ ءۇشىن ءتول تاريحىمىزدىڭ اۋقىمى كەڭ ەكەنىن تولىق سەزىنىپ، مادەني مۇرامىزدى ساقتاپ، ونى دارىپتەۋىمىز قاجەت.
قازاقستان – ۇلى دالاداعى كوشپەندىلەر وركەنيەتىنىڭ تىكەلەي مۇراگەرى. جەر جۇزىنە التىن وردا دەگەن اتپەن تانىلعان ايگىلى جوشى ۇلىسى ورتالىق ەۋرازيانىڭ بايتاق دالاسىنداعى ەڭ قۋاتتى مەملەكەت رەتىندە مويىندالعان. وسى ورتاعاسىرلىق دەرجاۆانىڭ گەوساياسي مۇراسى ءبىرقاتار ەۋرازيا مەملەكەتىنىڭ، سونىڭ ىشىندە قازاق حاندىعىنىڭ قۇرىلۋىنا نەگىز بولدى. ۇلىق ۇلىستىڭ جەرىندە سان الۋان ەتنوس جانە ءدىن وكىلدەرى ءبىر شاڭىراقتىڭ استىندا ءومىر ءسۇردى. ءتۇرلى مادەنيەتتەر ءوزارا استاسىپ، مەملەكەت قۇرۋ ءىسىنىڭ بىرەگەي ۇلگىسى قالىپتاستى- دەپ اتاپ ءوتتى مەملەكەت باسشىسى.
سونىمەن قاتار پرەزيدەنتىمىزدىڭ تاپسىرماسى بويىنشا ۇلتتىڭ جاڭا كەلبەتىن ايقىندايتىن نەگىزگى قۇندىلىقتار قالىپتاستىرۋ باسىم باعىتتا بولماق. بۇدان بىلاي قوعامدا لايىقتى ۇرپاق تاربيلەۋدە اتالعان قاعيدالار نەگىزگى باعىت بولارى انىق.
ەلىمىزدەگى ەڭ باستى جەتەكشى وقۋ ورنى بولىپ سانالاتىن ءال-فارابي اتىنداعى قازاق ۇلتتىق ۋنيۆەرسيتەتى پرەزيدەنتتىڭ قۇرىلتايدا ايتقان ماسەلەلەرىن عىلىمي نەگىزدەپ، ەرەكشە قولداۋ تانىتۋدا. ۇلتتىق قۇندىلىق پەن ءداستۇردى دامىتۋ اسىرەسە ناۋرىز مەرەكەسى سەكىلدى جالپىحالىقتىق مەرەكەلەردى اتاپ ءوتۋ سەكىلدى باسىمدىقتار وقۋ ورنىندا كەڭ كولەمدە كورىنىس بەردى. ۇلتتىق كيىم مەن ءداستۇردىڭ ۇلگىسى جاستار اراسىندا ۇلكەن قولداۋ تاپتى. مۇنداي اۋقىمدى شارا تەك ءبىر وقۋ ورنىنىڭ عانا ەمەس، مەملەكەتتىك دەڭگەيدەگى ماڭىزى بار وقيعا ەكەنى بەلگىلى. ويتكەنى ءقازىر الەم جىلدام وزگەرىپ وتىرادى. وسىعان وراي قۇندىلىقتار دا ءجيى وزگەرىسكە تۇسۋدە. ءبىز ءوز نەگىزىمىزدى ساقتاپ، دامىتۋعا مىندەتتىمىز.