الماتىداعى "دينامو" ستاديونىندا ناشاقورلىققا قارسى جارنامالاردى جويۋ ماقساتىندا "ناشاقورلىققا جول جوق" اتتى كەڭ اۋقىمدى جالپىقالالىق ناۋقان ۇيىمداستىرىلدى.
شارانىڭ ماقساتى – قوعامنىڭ نازارىن ەسىرتكى جارناماسىنىڭ تارالۋ ماسەلەسىنە اۋدارۋ، ازاماتتىق بەلسەندى ۇستانىمدى قالىپتاستىرۋ جانە جاستاردى قالا كەڭىستىگىن ەسىرتكى اينالىمىن ناسيحاتتايتىن جازبالار مەن ينتەرنەت-سىلتەمەلەردەن تازارتۋ ىسىنە جۇمىلدىرۋ.
- ەسىرتكى جارناماسى – بۇل تاۋەلدىلىككە اپارار العاشقى قادام. ول قىلمىسقا يتەرمەلەيدى جانە ادام ءومىرىن بۇزادى. سوندىقتان ءاربىر الماتىلىق مۇنداي جازبالاردى كورسە بەيجاي قاراماي، حابار بەرۋى ماڭىزدى. بۇل – قالانىڭ قاۋىپسىزدىگىنە قوسقان جەكە ۇلەس. الماتى ەسىرتكى مەن ونىڭ ناسيحاتىنان ازات قالا بولۋى ءتيىس. ال بۇل ناتيجەگە تەك پوليسيا مەن تۇرعىندار بىرلەسە ارەكەت ەتكەندە عانا قول جەتكىزۋگە بولادى، – دەدى الماتى قالاسى پوليسيا دەپارتامەنتىنىڭ ەسىرتكى قىلمىسىنا قارسى كۇرەس باسقارماسىنىڭ باستىعى مۇرات جۇمابايەۆ.
ناۋقانعا قاتىسۋشىلار قالا اۋداندارىنا ءبولىنىپ، قابىرعالار، قورشاۋلار مەن جەراستى وتكەلدەرىندەگى مەسسەندجەر نومىرلەرى مەن ەسىرتكى ساتۋعا قاتىستى اقپارات تاراتاتىن ينتەرنەت-سىلتەمەلەر جازىلعان جازبالاردى ءوشىرۋ جۇمىستارىن جۇرگىزدى. جالپى ناۋقانعا مىڭعا جۋىق ادام – ستۋدەنتتەر، ەرىكتىلەر مەن قوعامدىق ۇيىم وكىلدەرى قاتىستى. بىرلەسكەن جۇمىستىڭ ناتيجەسىندە ەكى مىڭنان استام ەسىرتكى جارناماسى جويىلىپ، ولاردىڭ بارلىعى بۇعاتتاۋ ءۇشىن ۋاكىلەتتى ورگاندارعا جولداندى.