بۇل تۋرالى وڭىرلىك كوممۋنيكاسيالار قىزمەتىنىڭ الاڭىندا "ناركوستوپ" جوباسىنىڭ PR مامانى جانار نۇرسەيىتوۆا ايتتى.
2022 جىلى ەرىكتىلەردىڭ بەلسەندى قاتىسۋمەن ەسىرتكىنى جارنامالايتىن 300 مىڭ گراففيتي بويالدى، دەپ حابارلايدى Almaty-akshamy.kz.
«2 جىلدا ۇلكەن جۇيەلى ناتيجەلەرگە قول جەتكىزىلدى. قاراپايىم مىسال كەلتىرەيىن، ەگەر العاشقى كۇندەرى 50-گە جۋىق ەرىكتىلەر دارى-دارمەكتىڭ جارناماسىن بوياۋعا شىقسا، ورتا ەسەپپەن ءبىر ەرىكتىگە 100 جازۋدان كەلەتىن. ءقازىر تۋرا سونداي الاڭدا 50 ەرىكتىگە 10-15 جازۋدان كەلەدى. بۇل سۋرەتتەردى ءوشىرىپ تاستاعان سوڭ قايتا پايدا بولعان گراففيتيلەر»، - دەدى سپيكەر.
ناشاقورلاردى ەمدەۋ جانە وڭالتۋ دا ماڭىزدى ماسەلە بولىپ تابىلادى، ويتكەنى جەكە ورتالىقتاردا بۇل سومانى ازاماتتاردىڭ قالتاسى كوتەرە بەرمەيدى. بەلسەندىلەر جەكە وڭالتۋ ورتالىقتارىنىڭ بارلىعى بىردەي ستاندارتتالماعانىن، سوعان قاراماستان، بىرنەشە جەكە ورتالىقتارمەن كەلىسىمگە قول جەتكىزىلگەنىن ايتادى. قارجىلاندىرۋدى جاستار ساياساتى جونىندەگى باسقارما قامتاماسىز ەتەدى.
جوبانىڭ بارلىق مەرزىمىندە 13 ادام تەگىن وڭالتۋدان ءوتتى. بيىل بەلسەندىلەر «جاڭا عاسىر» قاۋىمداستىعىمەن بىرلەسە وتىرىپ، وڭالتۋ ورتالىقتارىن رەتتەۋ جانە ەمدەۋ ستاندارتتارىن ەنگىزۋ ماسەلەسىنە باستاماشىلىق ەتۋدى ماقسات ەتىپ قويدى.
«ءبىز ساۋالناما جۇرگىزدىك، ونىڭ ناتيجەسى بويىنشا جاستاردىڭ 10%-ى ومىرىندە ءبىر رەت بولسا دا سينتەتيكالىق ەسىرتكى قابىلداعانىن انىقتادىق. سينتەتيكالىق ەسىرتكىنى پايدالانۋشىلار الەۋمەتتىك توپتارعا بولىنبەيدى. ال جالپى بۇل الەمدىك دەڭگەيدەگى ءقاۋىپتى ءۇردىس. ءبىز قوعام بولىپ ەسىرتكى قىلمىسىمەن بىرگە كۇرەسۋىمىز كەرەك»، - دەدى ءوز كەزەگىندە جاستار ساياساتى جونىندەگى باسقارما باسشىسىنىڭ ورىنباسارى ءازيز قاجدەنبەك.
بۇگىنگى تاڭدا ءبىر عانا الماتىدا ەسىرتكىگە تاۋەلدى 1130 ناشاقور رەسمي تىركەلگەن. مۇنداي دەرەكتەردى پسيحولوگ-ادديكتولوگ، جوبا بەلسەندىسى عاليا نازحانوۆا كەلتىردى، ول ەسىرتكىگە تاۋەلدىلەردىڭ ورتاشا جاسى تەز جاسارىپ بارا جاتقانىن ايتادى.
«مەنىڭ تاجىريبەمدە 11 جانە 12 جاستاعى بالالار بولدى. ولار سينتەتيكالىق ەسىرتكى مەن پسيحوستيمۋلياتورلاردى قولدانعان. ناشاقورلاردىڭ اراسىندا تباسىلى، نەمەرە ءسۇيىپ وتىرعان 60-تان اسقان ەرەسەكتەر دە بار»، - دەيدى ول.
جوبا بەلسەندىلەرى ءدارىحاناداعى ناشاقورلىق ماسەلەسىن بىرنەشە رەت كوتەرىپ، ءبىرقاتار مينيسترلىكتەرگە ءتيىستى حاتتار جولداعان. ۇكىمەت بيىل «ترامادول» پرەپاراتىن ەسىرتكى زاتتارىنىڭ تىزىمىنە ەنگىزدى.
سونداي-اق، جاستارمەن جۇمىس ىستەۋگە، ولاردىڭ بوس ۋاقىتىن ءتيىمدى وتكىزۋگە ەرەكشە كوڭىل بولىنەتىنىن ايتا كەتكەن ءجون. وسى ماقساتتا جوبا ەرىكتىلەرى قالادا جاسوسپىرىمدەردىڭ بوس ۋاقىتىن وتكىزۋ ورتالىقتارىن اشتى.
دەمالىس ورتالىقتارىنان باسقا، اتا-انالار نەمەسە تۋىستارى ناشاقورلىققا كۇدىكپەن جۇگىنە الاتىن فرونت-كەڭسەلەر دە بار. ادديكتولوگتار وقيعا ورىندارىندا العاشقى كەڭەس بەرىپ، جولداما بەرەدى. بۇل ماقساتتارعا 59 ميلليون تەڭگە ءبولىندى.
ناركوستوپ جوباسى العاش رەت الماتىدا 2021 جىلى ىسكە قوسىلدى. گراففيتيدەگى سۋرەتتەردى وشىرۋدەن باستالعان جوبا بۇگىندە باعىتىن كەڭەيتىپ، سينتەتيكالىق تاۋەلدىلىك ماسەلەسىنە كەشەندى تۇردە جاقىندادى.
بايانداماشى اتاپ وتكەندەي، الماتىلىقتار دا اۋلالارعا كامەرالار ورناتۋ ارقىلى ەسىرتكى قىلمىسىمەن كۇرەسكە ۇلەس قوسۋدا.
قالا تۇرعىندارى ءانونيمدى تۇردە الماتى قالالىق ءىىد-نىڭ WhatsApp-تاعى سەنىم تەلەفونى 8 705 549 70 25 نەمەسە "ناركوستوپتىڭ" جەدەل جەلىسى – 8 747 461 67 01 ارقىلى حابارلاسا الادى.