الماتىدا دزيۋدودان ازيا كۋبوگى وتەدى

سايىسقا جاسوسپىرىمدەر مەن جاستار قاتىسادى.

7-9 ءساۋىر كۇندەرى الماتى قالاسىنداعى بالۋان شولاق اتىنداعى سپورت سارايىندا بەكەت ماحمۇتوۆتى ەسكە الۋعا ارنالعان دزيۋدودان جاسوسپىرىمدەر مەن جاستار اراسىندا ازيا كۋبوگى وتەدى، دەپ حابارلايدى Almaty-akshamy.kz

حالىقارالىق دزيۋدو فەدەراسياسىنىڭ كۇنتىزبەسىنە سايكەس وتكىزىلگەلى وتىرعان جارىسقا 2006-2007 جىلدارى دۇنيەگە كەلگەن جاسوسپىرىمدەر مەن 2003-2005 جىلدارى تۋعان جاس تاتامي شەبەرلەرى قاتىسادى.

قازاقستان دزيۋدو فەدەراسياسىنىڭ باسپا ءسوز قىزمەتىنەن ءمالىم ەتكەنىندەي، IJF ەرەجەسىنە سايكەس ازيا كۋبوگىنىڭ جەڭىمپازدارى مەن جۇلدەگەرلەرىنە رەيتينگىلىك ۇپاي قوسىلادى.

جارىس جەڭىمپازدارىنا 100، كۇمىس جۇلدەگەرگە 60، قولا جۇلدەگەرگە 40 ۇپايدان بەرىلەدى.

بيىل التىنشى رەت ۇيىمداستىرىلىپ وتىرعان ازيا كۋبوگىنە قازاقستان، وزبەكستان، تاجىكستان، قىرعىزستان، موڭعوليا، گونكونگ، تۇركىمەنستان، گرەكيا، گرۋزيا جانە اقش-تان بارلىعى 400-دەن استام دزيۋدوشى قاتىسادى دەپ جوسپارلانعان.

بەكەت ساپابەك ۇلى ماحمۇتوۆ 2009-2012 جىلدار ارالىعىندا قازاقستان دزيۋدو فەدەراسياسىنىڭ پرەزيدەنتى، سونداي-اق، ازيا دزيۋدو وداعىنىڭ ۆيسە-پرەزيدەنتى قىزمەتىن اتقارعان.

دزيۋدودان بەكەت ماحمۇتوۆ اتىنداعى تۋرنير 2017 جىلدان بەرى الماتى قالاسىندا ءداستۇرلى تۇردە وتكىزىلىپ كەلەدى.

دزيۋدودان جاستار مەن جاسوسپىرىمدەر اراسىنداعى ازيا كۋبوگىنىڭ جارىس كەستەسى مىناداي:

7 ءساۋىر

جاسوسپىرىمدەر

جارىس ساعات 10.00-دە باستالادى.

فينالدىق بەلدەسۋلەر – 17.00.

ۇلدار: -50 كگ، -55 كگ، -60 كگ، -66 كگ، -73 كگ

قىزدار: -40 كگ، -44 كگ، - 48 كگ، - 52 كگ، -57 كگ

8 ءساۋىر

جارىستىڭ باستالۋى – 10.00.

فينالدىق بەلدەسۋلەر – 17.00.

جاسوسپىرىمدەر

ۇلدار: -81 كگ، -90 كگ، -100 كگ +100 كگ؛

قىزدار: -63 كگ، -70 كگ، -78 كگ، +78 كگ؛

جاستار

ۇلدار: -60 كگ، -66 كگ؛

قىزدار: -48 كگ، -52 كگ؛

9 ءساۋىر

جاستار

جارىستىڭ باستالۋى – 10:00

فينالدىق بەلدەسۋلەر – 17:00

جاستار: -73 كگ، -81 كگ، -90 كگ، -100 كگ، +100 كگ؛

جاسوسپىرىمدەر: -57 كگ، -63 كگ، -70 كگ، -78 كگ، +78 كگ.