پاريج وليمپياداسىنىڭ كۇمىس جۇلدەگەرى ناريمان قۇربانوۆ شاڭىراق كوتەردى، دەپ حابارلايدى aqshamnews.kz
ول ءوزىنىڭ ارىپتەسى، بەلگىلى گيمناست ايدا باۋىرجانوۆاعا ۇيلەنىپ جاتىر. پاريجدە كۇمىس مەدال ەنشىلەگەننەن كەيىن ناريمان قۇربانوۆ سۇيىكتىسى ايدانىڭ ۇيلەنۋ تۋرالى ۇسىنىستى كۇتىپ جۇرگەنىن ايتقان ەدى. ەندى ايدا باۋىرجانوۆا ءوز ۇياسىنان ۇزاتىلىپ، قوس گيمناست ەرلى-زايىپتى اتانىپ وتىر.
«ءبىز ايدا ەكەۋىمىز 2018 جىلى تانىستىق. سول ۋاقىتتان بەرى قىز-جىگىت بولىپ ارالاسىپ كەلەمىز. سۇيىكتىم ايدا دا گيمناستشى. ول دا سپورتتىڭ قيىندىعى مەن قىزىعىن جاقسى تۇسىنەدى. ءبىز ەكەۋىمىز دە ۇلكەن سپورت جولىنان وتكەنبىز، سوندىقتان بىر-بىرىمىزگە قولداۋ كورسەتىپ، العا جىلجۋىمىزعا ىقپال ەتىپ وتىرمىز. بۇيىرتسا، تويىمىز قىركۇيەكتە بولادى»، – دەپ جازدى قۇربانوۆ الەۋمەتتىك جەلىدەگى پاراقشاسىندا.
جاس جۇبايلار الداعى ۋاقىتتا سپورتتىق مانساپتارى مەن وتباسىلىق ومىرلەرىن قاتار الىپ ءجۇرۋدى جوسپارلاپ وتىر. ناريمان مەن ايدا سپورتتى ءارى قاراي جالعاستىرۋدى كوزدەپ، بولاشاقتا ەلىمىزدىڭ گيمناستيكا سالاسىنا قوسقان ۇلەستەرىن ودان ءارى نىعايتۋعا نيەتتەنۋدە.
ەكى سپورتشىنىڭ جانكۇيەرلەرى بۇل قۋانىشتى جاڭالىقتى جىلى قابىلداپ، جاس جۇبايلارعا باقىت تىلەپ، الداعى ومىرلەرىنە تەك ساتتىلىك تىلەدى.