«نارەستەلەرگە ەمىزىك ەمەس، رەزەڭكە قولعاپ بەرىلەدى»

الماتى قالاسى دەنساۋلىق ساقتاۋ باسقارماسى نارەستەلەرگە ەمىزىك ەمەس، رەزەڭكە قولعاپ بەرىلەدى دەگەن قاۋەسەتتى جوققا شىعاردى 

الەۋمەتتىك جەلىلەردە الماتىداعى پەريناتالوگيا جانە بالالار كارديوحيرۋرگياسى ورتالىعىندا رەانيماسيادا جاتقان جاڭا تۋعان سابيلەرگە ەمىزىكتىڭ ورنىنا رەزەڭكە قولعاپتار بەرىلەتىنى تۋرالى اقپارات تارادى. الماتى قالاسىنىڭ دەنساۋلىق ساقتاۋ باسقارماسىن بۇل اقپاراتتى جوققا شىعاردى، دەپ حابارلايدى almaty-akshamy.kz  stopfake.kz سىلتەمە جاساپ.

ۆەدومستۆونىڭ حابارلاۋىنشا، ورتالىقتا جاتقان بىردە-بىر بالاعا ەمىزىكتىڭ ورنىنا رەزەڭكە قولعاپ بەرىلمەگەن.

– الماتى قالاسىنىڭ قوعامدىق دەنساۋلىق ساقتاۋ باسقارماسى مەن پەريناتالوگيا جانە بالالار كارديوحيرۋرگياسى ورتالىعىنىڭ پاسيەنتتەردى قولداۋ جانە ىشكى اۋديت قىزمەتى وسى وقيعا بويىنشا تەرگەۋ جۇرگىزدى. اتاپ ايتقاندا، ستاسيوناردا جاتقان جاڭا بوسانعان ايەلدەر مەن مەديسينالىق قىزمەتكەرلەرگە سۇراقتار قويىلىپ، جاۋاپتار الىندى، الەۋمەتتىك جەلىدەگى وسى جاريالانىمعا قاتىستى بارلىق بەينەكامەرالار قارالدى. ورتالىق انا مەن بالانىڭ مالىمەتتەرىن الۋ ءۇشىن پوست اۆتورىنا حابارلاستى. الايدا، اۆتور قانداي دا بولماسىن اقپاراتتى بەرۋدەن باس تارتتى. سونداي-اق بارلىق جاڭا تۋعان نارەستەلەر انالارىنىڭ جانىندا بولىپ، انا ءسۇتىن ەمەتىنىن ايتا كەتكەن ءجون. نارەستە كيۋۆەزدە، بالالار رەانيماسياسىندا، جاڭا تۋعان نارەستەلەر پاتولوگياسى بولىمشەسىنىڭ قارقىندى تەراپيا پالاتالارىندا جاتقان جاعدايدا، ولارعا نەوناتولوگ پەن مەدبيكەلەردىڭ كۇتىم كورسەتىپ، باقىلايدى، بەينەباقىلاۋ جۇرگىزىلەدى. بەينەجازبالاردى قاراۋ كەزىندە بۇل فاكتى راستالعان جوق، – دەلىنگەن دەنساۋلىق ساقتاۋ باسقارماسىنىڭ حابارلاماسىندا.