ونلاين-كازينو تۇرىندەگى زاڭسىز ويىن بيزنەسىن ۇيىمداستىرعاندار ۇستالدى.
قارجى مونيتورينگ اگەنتتىگىنىڭ باسپا ءسوز قىزمەتىنىڭ اقپاراتىنا ساي، ويىندارعا قاتىسۋ سايتتاردا جاريالانعان Telegram ارناسىندا جارنا تولەۋ ءۇشىن جاسالعان سىلتەمە ارقىلى ىسكە اسقان.
«تولەم كارتشوتتارعا جانە ەلەكتروندىق ءاميانعا جىبەرىلگەن، ونى تولتىرعاننان كەيىن ويىندارعا قاتىسۋ ءۇشىن لوگين مەن پارول جاساقتالادى. ءباس تىگۋلەر مەن ۇتىستاردى تولەۋ شەتەلدىك تۇلعالاردىڭ كارتشوتتارى ارقىلى جۇزەگە اسىرىلعان.
اتىراۋ، اقتوبە جانە اقتاۋ قالالارىنىڭ اۋماعىندا ءتىنتۋ جۇرگىزىلىپ، ونىڭ بارىسىندا زاتتاي ايعاقتار – ويىن باعدارلامالارى بار نوۋتبۋكتەر، شەتەلدىك تۇلعالار مەن قازاقستان ازاماتتارىنا بەرىلگەن بانكتىك قوسىمشالارى بار تەلەفوندار الىندى»، دەلىنگەن حابارلامادا.
ۆەدومستۆونىڭ حابارلاۋىنشا، بارلىق جىلجىمالى جانە جىلجىمايتىن مۇلىككە جالپى سوماسى 167 ملن تەڭگەگە تىيىم سالىندى. ۇيىمداستىرۋشىلار مەن قاتىسى بار تۇلعالارعا تيەسىلى ەكىنشى دەڭگەيلى بانكتەردەگى بارلىق شوتتارعا دا تىيىم سالىنعان.
«ونلاين» قۇمار ويىندارى تاۋلىك بويى جۇرگىزىلىپ، كۇندەلىكتى اينالىمى شامامەن 800 000 تەڭگەنى قۇراعان. زاڭسىز ويىن بيزنەسىن ۇيىمداستىرۋعا پايدالانىلعان كارت شوتتارعا تۇسكەن قاراجاتتىڭ جالپى سوماسى 3 ملرد تەڭگەدەن اسادى.
كۇدىكتىلەر ۇستالىپ، ۋاقىتشا ۇستاۋ يزولياتورىنا قامالدى. ولارعا قاتىستى سوت 2 اي مەرزىمگە «قاماۋ» بۇلتارتپاۋ شاراسىنا سانكسيا بەردى»، دەپ حابارلادى قما.
ايتە كەتەيىك، ق ر كونستيتۋسياسىنىڭ 77-بابىنىڭ 3-تارماعىنىڭ 1-تارماقشاسىنا جانە ق ر قىلمىستىق-پروسەستىك كودەكسىنىڭ 19-بابىنىڭ 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن اركىم كىناسىز دەپ ەسەپتەلەدى.