2025 جىلعى 2 ماۋسىمدا قوستاناي وبلىسىندا تەرروريزمگە قارسى كۇرەس جونىندەگى رەسپۋبليكالىق جەدەل شتاپتىڭ باسشىسى – ۇقك ءتوراعاسى ە.ساعىمبايەۆتىڭ شەشىمىمەن «نايزا-انتيتەررور-2025» رەسپۋبليكالىق جەدەل-تاكتيكالىق تەرروريزمگە قارسى وقۋ-جاتتىعۋىنىڭ قورىتىندى كەزەڭى وتكىزىلدى.
وعان ۇلتتىق قاۋىپسىزدىك كوميتەتى، مەملەكەتتىك كۇزەت قىزمەتى، ىشكى ىستەر، قورعانىس، توتەنشە جاعدايلار، مادەنيەت جانە اقپارات، كولىك مينيسترلىكتەرى جانە جەرگىلىكتى اتقارۋشى ورگاندار قاتىستى، دەپ حابارلايدى aqshamnews.kz ق ر ۇقك تقو شتابىنا سىلتەمە جاساپ.
مۇددەلى مەملەكەتتىك ورگانداردىڭ تەرروريستىك سيپاتتاعى «گيبريدتى» قاۋىپتەرگە دەن قويۋعا جاۋىنگەرلىك ازىرلىك دەڭگەيى مەن ۇيلەسىمدىلىگىن تەكسەرۋ جۇزەگە اسىرىلدى.
جاۋىنگەرلىككە بارىنشا جاقىن جاعدايلاردا ديۆەرسيالىق-تەرروريستىك اكتىلەردىڭ الدىن الۋ، سونداي-اق ولاردىڭ سالدارىن بارىنشا ازايتۋ جانە جويۋ بويىنشا ترەنينگتەر وتكىزىلدى.
كيبەرشابۋىلدارعا دەن قويۋ، شارتتى تەرروريستەردى ىزدەۋ جانە انىقتاۋ، بروندى تەحنيكاسى بار ارنايى ماقساتتاعى كۇشتەردىڭ ورنىن اۋىستىرۋ، كەپىلگە الىنعانداردى بوساتۋ جانە جارىلعىش قۇرىلعىلاردى زالالسىزداندىرۋ جونىندەگى وپەراسيالاردى جۇرگىزۋ بويىنشا ۆەدومستۆوارالىق ءوزارا ءىس-قيمىل جاساۋ تەتىكتەرى پىسىقتالدى.
سونىمەن قاتار شاقىرىلعان جۋرناليستەر ءۇشىن تەرروريزمگە قارسى ءىس-قيمىل ماسەلەلەرىن اقپاراتتىق كەڭىستىكتە جاريالاۋ بويىنشا سەمينار-ترەنينگ وتكىزىلدى.
وقۋ-جاتتىعۋلاردىڭ قورىتىندىلارى بويىنشا بارلىق ماقساتتارعا قول جەتكىزىلدى، قويىلعان مىندەتتەر ورىندالدى. ەلىمىزدىڭ اۋماعىنداعى تەرروريستىك قاۋىپتەرگە قارسى ءىس-قيمىل شارالارىن جەتىلدىرۋ بويىنشا قوسىمشا شەشىمدەر ازىرلەندى.