Aport Mall East ويىن-ساۋىق ورتالىعىندا بالالارعا ارنالعان جان جىلۋىنا تولى ەرەكشە شارا ءوتتى.
«بالالارعا قۋانىش سىيلا» اتتى قايىرىمدىلىق جوباسى اياسىندا ومىرلىك قيىن جاعدايعا تاپ بولعان بۇلدىرشىندەرگە ارنالعان ءىس-شارانى قازاقستان حالقى اسسامبلەياسى جانىنداعى انالار كەڭەسى ۇيىمداستىردى. ماقسات – تاعدىر تاۋقىمەتىن ەرتە سەزىنگەن بالالاردىڭ جۇزىندە شاتتىق كۇلكى ويناتىپ، ولارعا مەيىرىم مەن قامقورلىقتى سەزىندىرۋ.
مەرەكەلىك كەشكە الماتى قالاسىنداعى بالالاردى قولداۋ ورتالىعىنىڭ 48 تاربيەلەنۋشىسى قاتىستى. بالالار ءۇشىن بۇل كۇن ەرەكشە ەستە قالارلىقتاي بولارى ءسوزسىز. تاتتىلەر مەن شىرىننان ءدام تاتىپ، بالمۇزداق جەپ شات-شادىمان كۇي كەشكەن بۇلدىرشىندەر ودان كەيىن «Halyk IMAX Kinopark 16» كينوتەاترىندا قىزىقتى مۋلتفيلم تاماشالادى.
– ءبىزدىڭ ماقسات – بالالارعا قۋانىش سىيلاۋ. اسسامبلەيا جانىنداعى انالار كەڭەسى ءاردايىم وسىنداي يگى ىستەرگە باستاماشى بولىپ كەلەدى. بۇل ءبىزدىڭ ءداستۇرلى شارامىز. بالالارعا تاتتىلەر، بالمۇزداق، چيپسى، بۋرگەرلەر تاراتتىق. كينوسەانستان كەيىن دە ارنايى اس ءمازىرىمىز بار، – دەيدى الماتى قالاسى قوعامدىق دامۋ باسقارماسىنىڭ وكىلى، انالار كەڭەسىنىڭ كۋراتورى بالاجان اردابايەۆا.
ونىڭ ايتۋىنشا، انالار كەڭەسى «چۋجيح دەتەي نە بىۆاەت» جوباسى اياسىندا دا ءتۇرلى الەۋمەتتىك مەكەمەلەرمەن، بالالار ۇيىمەن بايلانىستا جۇمىس ىستەپ كەلەدى. بۇگىنگى شاراعا كينوتەاتر باسشىلىعى دەمەۋشىلىك جاساپ، بالالار ءۇشىن ەسىگىن ايقارا اشتى.
بالالارمەن بىرگە كەلگەن №1 ارنايى الەۋمەتتىك قىزمەتتەر كورسەتەتىن مەملەكەتتىك ورتالىقتىڭ پەداگوگ-پسيحولوگى بوستانگۇل ساديروۆا مۇنداي شارالاردىڭ تاربيەلىك ءارى پسيحولوگيالىق ماڭىزى زور ەكەنىن ايتتى:
– بۇگىن بالالار ءۇشىن ناعىز مەرەكە بولدى. كانيكۋل ۋاقىتى باستالعان سوڭ، لاگەر اياسىندا ولاردى سەرگىتىپ، قۋانتقىمىز كەلدى. بىزگە جىل سايىن انالار كەڭەسى قولداۋ بىلدىرەدى. كينوتەاترعا اپارىپ، داستارقان جايىپ، بالعىندارعا قۋانىش سىيلاۋ – ۇلكەن قايىرىمدىلىق. ءبىزدىڭ ورتالىقتا ءتۇرلى ستاتۋستاعى بالالار بار – جەتىمدەر، اتا-اناسىنىڭ قامقورلىعىنسىز قالعاندار، نەمەسە وتباسىندا قيىن جاعدايعا تاپ بولعاندار. بالالار وسىندا شامامەن 6 ايداي تۇرادى. كەيىن ولاردىڭ تاعدىرى سوت ارقىلى شەشىلەدى. ورتالىق تاۋلىك بويى جۇمىس ىستەيدى، بالالاردى بىزگە نەگىزىنەن پوليسيا مەن قامقورشىلىق ورگاندارى الىپ كەلەدى، – دەدى ول.
بۇل شارا – تەك بالالاردى قۋانتۋدىڭ عانا ەمەس، قوعامداعى جاۋاپكەرشىلىك پەن جاناشىرلىقتى ارتتىرۋدىڭ دا كورىنىسى. اتا-انانىڭ قامقورلىعىنسىز نەمەسە قيىن جاعدايعا تاپ بولعان بالانىڭ ءار كۇنى – سىناق. ال وسىنداي كۇندەرى ولارعا مەيىرىم مەن قامقورلىقتى سەزىندىرۋ – ناعىز ازاماتتىق ۇستانىم. «بالالارعا قۋانىش سىيلا» جوباسى – جۇرەككە جىلۋ سىيلاعان باستاما رەتىندە ەستە قالارى ءسوزسىز.
