بيبىگۇل تولەگەنوۆا 95 جاسىن «استانا وپەرا» ساحناسىندا اتاپ ءوتتى.
«استانا وپەرا» تەاترى ساحناسىندا اتاقتى ونەر قايراتكەرلەرى باس قوسىپ، اڭىزعا اينالعان ءانشى بيبىگۇل تولەگەنوۆانى مەرەيتويىمەن قۇتتىقتادى، دەپ حابارلايدى aqshamnews.kz.
ق ر مادەنيەت جانە اقپارات مينيسترلىگىنىڭ قولداۋىمەن ۇيىمداستىرىلعان كونسەرتكە شاحيماردان ءابىلوۆ، ايگۇل ۇلكەنبايەۆا، الفيا كاريموۆا، سونىمەن قاتار زارينا التىنبايەۆا، تولقىن زابيروۆا، سامال بايسەيىتوۆا، ايزادا وماروۆا جانە نۇرعالىم امانباي سىندى كوپتەگەن تانىمال ارتىستەر قاتىستى.
كەش احمەت جۇبانوۆ پەن لاتيف ءحاميديدىڭ «اباي» وپەراسىنان «تويباستار» جارقىن كورىنىسىمەن باستالدى. ب.تولەگەنوۆا بايقاۋىنىڭ لاۋرەاتتارى راسۋل جارماعامبەتوۆ پەن تاتيانا ۆيسينسكايا، «استانا وپەرا» حورى، وركەسترى مەن بالەت ترۋپپاسى ديريجەر، «قۇرمەت» وردەنىنىڭ كاۆالەرى رۋسلان ءبايمۋرزيننىڭ جەتەكشىلىگىمەن بۇكىل كونسەرتكە مەرەكەلىك شىراي قوستى.
سونداي-اق قازاقستاننىڭ ەڭبەك سىڭىرگەن قايراتكەرى نۇرلان ونەربايەۆتىڭ مانەرلەپ وقۋىنداعى فاريزا وڭعارسىنوۆانىڭ «بيبىگۇل – ءان» ولەڭى كەشتىڭ كوركىنە اينالدى. مەرەيتوي يەسىنىڭ شاكىرتى، قازاقستاننىڭ ەڭبەك سىڭىرگەن قايراتكەرى تولقىن زابيروۆانىڭ ورىنداۋىنداعى لاتيف ءحاميديدىڭ «بۇلبۇل» ايگىلى ءانى بارشا حالىقتىڭ سۇيىسپەنشىلىگى رەتىندە قابىلداندى. بۇل ءان ب.تولەگەنوۆا شىعارماشىلىعىندا الدەقاشان بەيرەسمي سيمۆولعا اينالعان ەدى.
«اتا تولعاۋى» قازاق ءبيىن ورىنداعان «استانا بالەت» ترۋپپاسى ەرەكشە سىي-سياپات جاسادى. كورەرمەندەر «Forte Trio» اسپاپتىق ءانسامبلىنىڭ ورىنداۋىنداعى قازاق اندەرىنەن ءپوپۋرريدى دە ىقىلاسپەن قابىلدادى.