الماتىدا جىل سايىن وتەتىن الپينيادادا مىڭنان استام تاۋ اۋەسقويلارى جاستار شىڭىنا كوتەرىلدى
«الپينيادا-2024» ءوز مارەسىنە جەتتى. 12 مامىردا پانفيلوۆشىلار شىڭىنا (4120 م)، 7 شىلدەدە نۇرسۇلتان (كومسومول) شىڭىنا (4376 م) جانە 31 تامىزدا جاستار شىڭىنا (4137 م) كوتەرىلۋ ءوتتى، دەپ حابارلايدى aqshamnews.kz
جازدىڭ سوڭعى كۇنى جاستار شىڭىنا كوتەرىلۋگە 1 مىڭنان استام ادام قاتىستى. 1ب الپينيستىك ساناتىنداعى مارشرۋت الماتى قالاسىنىڭ تۋريزم باسقارماسىنىڭ قولداۋىمەن، الماتى قالاسىنىڭ الپينيزم فەدەراسياسى، الماتى قالاسىنىڭ الپينيزم مەكتەبى جانە Turclub.kz سپورتتىق تۋريستەر قاۋىمداستىعىنىڭ الپينيستەرىنىڭ مۇقيات دايىندىعىمەن ءوتتى.
«شىمبۇلاق» تاۋ-شاڭعى كۋرورتىنان جاستار شىڭىنىڭ باسىنا دەيىن قاتىسۋشىلار شامامەن 10 كم جول، 2000 م بيىكتىكتى ءجۇرىپ ءوتتى. قاتىسۋشىلاردىڭ باسىم كوپشىلىگى كىشى الماتى شاتقالىندا ورنالاسقان تۇيىق-سۋ مۇزدىعىندا تۇنەپ شىقتى.
الپينيادانىڭ تەحنيكالىق بولىگى بارلىق تالاپتارعا ساي ارقاندى قورعاۋ ارقىلى جانە تولىققاندى الپينيستىك جابدىقتارمەن ءوتتى. جول بويى الپينيزم فەدەراسياسىنىڭ ارنايى ۆولونتەرلەرى بارلىق قاتىسۋشىلارعا كومەك كورسەتىپ وتىردى. شىڭعا 354 قاتىسۋشى كوتەرىلدى. ولاردىڭ قاۋىپسىزدىگىن 25 الپينيست پەن الماتى قالاسى اكىمدىگى قۇتقارۋ قىزمەتىنىڭ 15 قۇتقارۋشىسى قامتاماسىز ەتتى.
بيىلعى الپينياداعا ەرەكشە بالالار دا قاتىستى، ولار ءۇشىن مارشرۋتتىڭ قولجەتىمدى بولۋىن ەسكەرە وتىرىپ ارنايى تۋر دايىندالدى. ينكليۋزيۆتى توپتاعى 29 بالا اتا-انالارى جانە گيدتەردىڭ ەرىپ جۇرۋىمەن بىرگە «تۇيىق-سۋ» الپلاگەرىنىڭ جانىنداعى قارا سارقىراماعا دەيىن ءجۇرىپ ءوتتى.
«الپينيادا-2024» قورىتىندىسى بويىنشا ءۇش جاپپاي كوتەرىلۋگە ءۇش مىڭنان استام قالا تۇرعىندارى مەن قوناقتارى قاتىستى. پانفيلوۆشىلار شىڭىنا 310 ادام، نۇرسۇلتان (كومسومول) شىڭىنا 355 ادام جانە جاستار شىڭىنا 354 ادام جەتتى. ەكو-تۋرلارعا 68 ەرەكشە بالا قاتىستى.
الماتى قالاسى الپينيزم فەدەراسياسىنىڭ شاقىرۋىمەن الپينيادانىڭ قۇرمەتتى قوناعى فرانسيانىڭ باس وكىلى فابريس نيەۆا العاش رەت جاستار شىڭىن باعىندىردى. ول دايىندىق دەڭگەيىنىڭ جوعارىلىعىن جانە الپينيست-ۆولونتەرلەردىڭ جۇمىسىن ەرەكشە اتاپ ءوتتى.