«مىڭجىلدىقتار توعىسىنداعى وركەنيەت»

الماتىداعى مەملەكەتتىك ورتالىق مۋزەيدە وسىنداي اتاۋمەن كورمە اشىلدى.

قازاقتىڭ ءداستۇرلى مادەنيەتىن ايشىقتايتىن كورمە تۇركسوي ۇيىمىنىڭ 30 جىلدىعىنا ارنالدى، دەپ حابارلايدى Almaty-akshamy.kz.

24.kz اقپاراتى بويىنشا، حالىقارالىق ۇيىم تامىرلاس تۇركى حالىقتارىنىڭ تاريحي جانە رۋحاني تۇرعىدا بىرىگۋىنە كۇش سالىپ كەلەدى. «بۇل كورمە تاريحي-مادەني مۇرانى ناسيحاتتاۋ، مادەني گۋمانيتارلىق بايلانىستاردى دامىتۋ جانە تۇركى مادەنيەتىن حالىقارالىق دەڭگەيدە ىلگەرىلەتۋدى ماقسات ەتىپ وتىر»، - دەيدى ۇيىمداستىرۋشىلار. كورمەگە بوتاي مادەنيەتىنە ءتان ات ابزەلدەرى، تۇرمىستىق زاتتار، ساندىك-قولدانبالى ونەر جانە زەرگەرلىك بۇيىمدار، كىلەم جانە كيىزدەن جاسالعان زاتتار مەن ءداستۇرلى كيىم ۇلگىلەرى قويىلدى. بىرەگەي جادىگەرلەردىڭ بارلىعى مەملەكەتتىك ورتالىق مۋزەيدىڭ قورىنان الىندى.

«ۇلى دالانىڭ 7 قىرى دەپ ايتامىز عوي، سول ۇلى دالانىڭ  جەتى قىرىن اشاتىن زاتتار تۇر. سونىڭ ىشىندە بوتايدان باستادىق. ويتكەنى سول بوتاي حالقىنىڭ اتا-باباسى وسى قازاق جەرىندە جىلقى قولعا ۇستاعانى دالەلدەنگەن بولاتىن. سونى دالەلدەيتىن زاتتار تۇر. جانە دە روسوماحا دەگەن يت ءتارىزدى جانۋاردىڭ قاڭقاسى جاتىر. ول سول زاماندا اتا-بابالارىمىزدىڭ يت ءتارىزدى جانۋاردى دا قولعا ۇستاپ بىلگەنىن، ۇيگە قولعا ۇستاۋعا بىلگەنىن كورسەتەدى»، - دەيدى ق ر مەملەكەتتىك ورتالىق مۋزەيى ديرەكتورىنىڭ ورىنباسارى عاليا تەمىرتون.