الماتى قالاسى اكىمدىگىنىڭ قولداۋىمەن قازاقستان ايەلدەر كۇشتەرى اليانسى مەن قسدق (Kimep Association of Sport Development) بىرلەسە وتىرىپ، جىل سايىنعى «SOI – «جاستار تازا اۋا ءۇشىن» شوۋ-بايقاۋىن ءساتتى وتكىزدى.
SOI (students on Ice، ياعني «مۇز ۇستىندەگى ستۋدەنتتەر») مۇزدى شوۋ بايقاۋىنا قاتىسۋعا نيەت بىلدىرگەن 11 جۇپ ستۋدەنتتى سپورت شەبەرى، قازاقستان چەمپيونى، ازيا جارىستارىنىڭ چەمپيونى رەگينا گلازمان بەس اي بويى، كۇندەلىكتى ءبىر تىنباي دايىنداعان بولاتىن. ەڭبەك اقتالدى دەسەك بولادى. «الماتى ارەنا» جاستاردىڭ مۇز-شوۋىن تاماشالاۋعا كەلگەن كورەرمەنگە لىق تولدى. دەمەك بيلەت جاقسى ساتىلعان. ال تۇسكەن قارجىعا الماتىنىڭ تۇركسىب اۋدانىنداعى ءال-اۋقاتى تومەن 20 وتباسىعا گاز تارتىلادى. مىنە، ءسويتىپ قالامىزدىڭ قايىرىمدى جاستارى وسىلايشا ۇلكەن ىسكە ۇلەس قوسىپ وتىر. ال مۇز ايدىنىندا مانەرلەپ سىرعاناپ شوۋ جاساعان جەڭىمپاز جاستاردىڭ قۋانىشىندا شەك جوق، ارينە.
ءيا، بۇگىندە ەكولوگيالىق احۋال ءبىزدىڭ قالادا عانا ەمەس، بۇكىل الەم بويىنشا ماڭىزدى تاقىرىپقا اينالىپ وتىرعانى راس. پەشكە جاعىلعان كومىردىڭ ءوزى اۋانىڭ لاستاپ، ادام دەنساۋلىعىنا ۇلكەن ەكولوگيالىق ءقاۋىپ توندىرەتىنى بەلگىلى. 2019 جىلى الماتى قالاسى الەمدەگى ەكولوگيالىق ءقاۋىپتى 100 قالانىڭ قاتارىنا كىرىپ، 95ء-شى ورىندا شىققان بولاتىن.
وسكەلەڭ ۇرپاقتىڭ قالا ماسەلەسىنە بەي-جاي قاراماي، ونى وڭىمەن شەشۋگە بەلسەنە اتسالىسىپ، قالا تاريحىندا ءوز قولتاڭباسىن قالدىرۋعا دەگەن ۇمتىلىسى وتە قۋانتادى.
«بۇل جوبانىڭ تاريحى ۇزاق، پاندەميا جاعدايلارىنا بايلانىستى ونى ەكى جىلعا توقتاتا تۇرۋعا تۋرا كەلگەن ەدى. ال بۇگىنگى كۇنى 10 جىلدىق مەرەيتويلىق شوۋمەن جالعاسىن تاپقانىنا قۋانىشتىمىز. بۇدان كەيىن جىل سايىن وسى الەۋمەتتىك ماڭىزى بار ءىس-شاراعا جاستاردى كوبىرەك تارتا وتىرىپ، ءارى قاراي جالعاستىرۋدى جوسپارلاپ وتىرمىز»، – دەيدى الماتى قالالىق ايەلدەر كۇشتەرى اليانسى ءتوراعاسىنىڭ ورىنباسارى ءاليا احمەدجانوۆا.