دارىگەرلەر دابىل قاعىپ وتىر.
قازاقستاندىقتاردا تاعى ءبىر مەديسينالىق پرەپاراتقا تاۋەلدىلىك پايدا بولدى، دەپ حابارلايدى Almaty-akshamy.kz Elorda.info سايتىنا سىلتەمە جاساپ.
بۇل جولعى ءقاۋىپ ءدارىحانا سورەلەرىندە ەركىن ساتىلاتىن تىنىس الۋدى جەڭىلدەتۋگە ارنالعان تامشىلاردان ءتونىپ تۇر. جىلدار بويى مۇرىنعا تامىزاتىن سپرەيدى ۇزدىكسىز پايدالانۋدىڭ سوڭى وپەراسياعا الىپ كەلۋى مۇمكىن. ءقازىر مۇنداي ناۋقاستاردىڭ سانى ارتقان. مۇرىن دارىسىنە تاۋەلدى بولعانداردىڭ ءبىرى – ەلوردالىق ارنۇر بەيسەنبايەۆ. جاز كەلىپ، كوك شىعا باستاعاندا، ونىڭ اللەرگياسى قوزىپ، تىنىس الۋى قيىندايدى. العاش رەت مۇرىنعا ارنالعان سپرەيدى وسى مەزگىلدە قولدانا باستاعان. پرەپارات باستاپقىدا كومەكتەسەدى، ءبىراق كەيىن وعان بايلانىپ، تاۋەلدى بولا باستاعان.
«مۇرىنمەن دۇرىس دەمالا المايمىن، سول كەزدە مەن نافتيزين الاتىن بولدىم. جانە ول ادەتكە اينالىپ كەتتى، مۇرىن بىتەلگەندە الا بەردىم، ۇنەمى قولداناتىن بولدىم. ارادا ءبىراز ۋاقىتتا ونسىز جۇرە المايتىن جاعدايعا جەتتىك»، - دەدى قالا تۇرعىنى.
جالپى، مۇنداي ماسەلەگە كەزىككەن تۇرعىن كوپ. ادەتتە، تىنىس الۋ مۇشەسى مازالاعاندار جىلدار بويى دارىگە تاۋەلدى بولىپ جۇرەدى. دارىگەرلەردىڭ ايتۋىنشا، مۇنداي ناۋقاستار اراسىندا بالالار دا بار. مۇرىنعا تامشى تيگەننەن كەيىن تامىرلار تارىلىپ، ءىسىنۋ باسىلادى جانە تىنىس بىردەن اشىلادى. الايدا، بۇل ءدارى اۋرۋدى ەمدەمەيتىنىن ەسكەرگەن ءجون. ول بار بولعانى سيمپتومدى جەڭىلدەتەدى.
«تامىر تارتقىش پرەپاراتتاردى ۇزاق ۋاقىت قولدانعان كەزدە ول جەردە ءبىرىنشى قان اينالىمى بۇزىلادى. جانە ۇزاق ۋاقىت پايدالانسا نورمادا بولىنەتىن سۇيىقتىقتىڭ كونسيتەنسياسى دا بۇزىلادى. سوعان بايلانىستى گيپەرتروفيا پايدا بولادى. ياعني، ۇزاق ۋاقىت پايدالانعان پاسيەنتتەر ونى الىپ تاستايىن دەسە دە، الا المايدى. ويتكەنى، مۇرىندا ءىسىنۋ پايدا بولعان. دەمالۋ قيىندايدى، مۇرىننان كوپ سۇيىقتىق بولىنەدى. ول سوزىلمالى بولادى، سوعان بايلانىستى دەمالۋ قيىنداي بەرەدى. سوسىن ءماجبۇرلى تۇردە قولدانا بەرەدى»، - دەدى دارىگەر سەرىك كوكتەبايەۆ.
مۇنداي دارىلەردى 1 اپتادان ارتىق پايدالانۋعا بولمايدى. ەگەر 1 اي قولدانسا، مۇرىننىڭ شىرىشتى قاباتى ولەدى. ال 1 جىل قولدانسا، ونى مەديسينالىق جولمەن ەمدەۋ قيىندايدى. مۇرىن تولىق بىتەلىپ قالۋى مۇمكىن. مۇنداي جاعدايدا وتا جاساتۋدان باسقا امال قالمايدى دەيدى دارىگەرلەر.
بۇل پرەپاراتتاردى ساتىپ الۋ قيىن ەمەس. كەز كەلگەن ءدارىحانا سورەسىندە سامساپ تۇر.
مۇنداي دارىلەردى تالاپقا ساي قولدانسا، ەشقانداي تاۋەلدىلىككە الىپ كەلمەيدى. ەرەسەكتەر كۇنىنە 3 رەت، 7 كۇن عانا پايدالانۋ كەرەك كەرەك. ال بالالارعا 3 كۇن دە جەتەدى. ارينە، كەز كەلگەن ءدارىنى شەكتەن تىس پايدالانسا كەرى اسەر ەتەدى. نەگىزىنەن، مۇرىنعا ارنالعان سپرەيلەر بەلگىلى ءبىر ۋاقىتتا عانا كومەكتەسەدى، - دەدى ق ر دسم دارىلىك زاتتار مەن مەديسينالىق بۇيىمداردى ساراپتاۋ ۇلتتىق ورتالىعىنىڭ ساراپشىسى گۇلجان تاستانوۆا.
دارىگەر سەرىك كوكتەبايەۆ مۇنداي پرەپاراتتارعا قۇزىرلى ورگاندار باقىلاۋىن كۇشەيتۋى كەرەك دەيدى. ونىڭ ايتۋىنشا، ءدارىنى ناۋقاسقا تەك مامانداردىڭ رۇقساتىمەن ساتقان ءجون. ايتپەسە، جاعداي ۋشىعا بەرۋى مۇمكىن.