الماتىداعى ناۋرىزباي اۋداندىق سوتىندا مۇقاعاليدى "سورلى ەركەك" دەگەن بلوگەر الىشەر تەمەنوۆكە قاتىستى ءىس قارالىپ جاتىر، دەپ حابارلايدى aqshamnews.kz Sputnik قازاقستان-عا سىلتەمە جاساپ.
بلوگەردىڭ ۇستىنەن مۇقاعالي ماقاتايەۆتىڭ ۇلى جۇلدىز ماقاتايەۆ شاعىم تۇسىرگەن. ول تەمەنوۆكە قاتىستى قىلمىستىق كودەكستىڭ 131-بابى 2-تارماعى "قورلاۋ" فاكتىسى بويىنشا قىلمىستىق ءىس قوزعاۋدى سۇراعان. قىلمىستىق ءىستى الماتىنىڭ ناۋرىزباي اۋداندىق سوتىندا سۋديا بەينەگۇل قايسينا قارادى.
ال تەمەنوۆ ادۆوكات جالداماق بولعان، ءبىراق ءالى تاپپاپتى. ول سوتقا رەسمي وكىلى مەيىرمان شەكەيەۆپەن كەلدى.
الىشەر تەمەنوۆ سوت زالىندا جۋرناليستەردىڭ ءوزىن تۇسىرۋىنە قارسىلىق ءبىلدىردى. بلوگەردىڭ رەسمي وكىلى سۋدياعا سوتتاسپاي-اق تاتۋلاسۋعا كەلىپ ەدىك دەدى.
"بۇل ەكى كىسى تۇپتەپ كەلگەندە تۋىس. ءبىر اتانىڭ بالالارى. نەگىزى تەمەنوۆ ءوز ارەكەتى ءۇشىن كەشىرىم سۇراعان، مۇمكىن سىزدەن كەشىرىم سۇراماعان شىعار. ءوزىم دە قارسى بولعانمىن. ءبىراق ءبىزدىڭ كومەككە جۇگىنگەن سوڭ كومەكتەسەيىك دەپ شەشتىك. مۇمكىن بولسا سىزدەن كەشىرىم سۇراساق دەپ ەدىك"، - دەدى بلوگەردىڭ رەسمي وكىلى مەيىرمان شەكەيەۆ مۇقاعاليدىڭ ۇلى جۇلدىز ماقاتايەۆقا.
سۋديا 10 مينۋت ءۇزىلىس جاريالاپ، ەكى تاراپقا تاتۋلاسۋعا مۇمكىندىك بەردى.
"مەن كۇيزەلىسكە ءتۇستىم، ءبىزدىڭ اتىمىزعا نۇقسان كەلتىردى، مورالدىق شىعىن كەلتىردى. 10 ملن تەڭگە مورالدىق شىعىن وتەسىن. جەلىدە كەشىرىم سۇراسىن. ارى قاراي كورەمىز"، - دەدى جۇلدىز ماقاتايەۆ سوتتا.
ال بلوگەردىڭ رەسمي وكىلى كەلىسىپ كورەمىز دەگەندى ايتتى.
بىلتىر 8 قازاندا بلوگەر الىشەر تەمەنوۆ الەۋمەتتىك جەلىدە مۇقاعالي ماقاتايەۆتى بىلاپىت سوزدەرمەن قورلاپ بەينەجازبا جاريالادى. الايدا بلوگەر بەينەجازبالارىن ءوشىرىپ ۇلگەرگەن، ءبىراق ۆيدەو لەزدە حالىققا تاراپ كەتتى. مۇقاعاليدىڭ جەرلەستەرى بۇل قورلىققا شىداماي، تەمەنوۆتىڭ ۇيىنە دەيىن بارىپ، ىزدەۋ سالعان. ارتىنان بلوگەر مەن اكەسىن مۇقاعاليدىڭ تۋعان جەرى قاراسازعا اپارىپ، حالىقتان كەشىرىم سۇراتتى.
الىشەر تەمەنوۆ الماتى وبلىسى ۇيعىر اۋدانى سۇڭقار اۋىلىنىڭ تۇرعىنى. ول سوتتا ءبىر قىزى بارىن جانە ايەلىنىڭ ەكىنشى بالاعا جۇكتى ەكەنىن ايتتى. تۇراقتى جۇمىسى جوق، تەك بلوگەرلىكپەن اينالىسادى. العاش رەت سوتتالىپ جاتىر.
ول جۋرناليستەرگە قانداي دا ءبىر ءۋاج ايتۋدان باس تارتتى.
ال مۇقاعاليدىڭ بالاسى جۇلدىز ماقاتايەۆ:
"وسى كۇنگە دەيىن الدىما كەلىپ كەشىرىم سۇرامادى. كۇيزەلىسكە ءتۇستىم. اكەم مۇقاعالي "بالام، مەنى حالىق جامانداسىن، ويتكەنى پەندەمىن، ءبىراق مەنىڭ شىعارمالارىمدى جامانداعان ادامدى كەشىرمەيمىن" دەپ ەدى. تەمەنوۆ نە ءۇشىن بۇلاي ايتقانىن تۇسىندىرمەدى، ءبىراق وكىنەتىنىن ايتتى"، - دەدى جۇلدىز ماقاتايەۆ.
سوت ارى قاراي جالعاسادى.