سارايەۆو قالاسىندا (بوسنيا جانە گەرسەگوۆينا) 22 ەلدىڭ وقۋشىلارى قاتىسقان بالقان حالىقارالىق ماتەماتيكالىق وليمپياداسى (BMO) اياقتالدى.
قازاقستاندىق وقۋشىلار ەل قورجىنىنا ءۇش كۇمىس جانە ءۇش قولا مەدال سالىپ، 100% كورسەتكىش كورسەتتى، دەپ حابارلايدى aqshamnews.kz.
قازاقستان قۇراماسى جالپى التى جۇلدە يەلەندى:
كۇمىس جۇلدە يەگەرلەرى:
• امير ساحيپوۆ — الماتى قالاسىنداعى ءرفمم-نىڭ 11-سىنىپ وقۋشىسى؛
• مارعۇلان شارەل — استانا قالاسىنداعى Spectrum مەكتەبىنىڭ 11-سىنىپ وقۋشىسى؛
• ەلدار ۇسەنوۆ — الماتى قالاسىنداعى نازاربايەۆ زياتكەرلىك مەكتەبىنىڭ 10-سىنىپ وقۋشىسى.
قولا مەدال يەگەرلەرى:
• دامير نۇرلانوۆ — اقتاۋ قالاسىنداعى نازاربايەۆ زياتكەرلىك مەكتەبىنىڭ 12-سىنىپ وقۋشىسى؛
• ءامىرلان امانجولوۆ — الماتى قالاسىنداعى Haileybury مەكتەبىنىڭ 11-سىنىپ وقۋشىسى؛
• بەردىبەك ورىنباسار — اتىراۋ وبلىسىنداعى №1 «ءبىلىم-يننوۆاسيا» ليسەيىنىڭ 10-سىنىپ وقۋشىسى.
«BMO وليمپياداسىنا قاتىسۋ – قازاقستان قۇراماسىنىڭ شىلدە ايىندا اۆستراليانىڭ كۆينسلەند قالاسىندا وتەتىن حالىقارالىق ماتەماتيكالىق وليمپياداعا (IMO) دايىندىعىنداعى ماڭىزدى كەزەڭ. مەملەكەتكە جاس تالانتتاردى قولداعانى ءۇشىن، سونداي-اق ۇستازدارىما جانە بارلىق جاتتىقتىرۋشى كومانداعا كاسىبي دايىندىق ءۇشىن شىن جۇرەكتەن العىس ايتامىن»، – دەدى وليمپيادانىڭ كۇمىس جۇلدەگەرى مارعۇلان شارەل.
ۇلتتىق قۇرامانىڭ جاتتىقتىرۋشىلارى – اسىلبەك يساحوۆ پەن مۇحتار قاباق.
ەستەرىڭىزگە سالا كەتەيىك، بۇل – قازاقستاندىق وقۋشىلاردىڭ ەكىنشى رەكوردتىق ناتيجەسى. 2024 جىلى دا ولار ۇزدىك ۇشتىكتەن كورىنگەن بولاتىن.