«مۇقاعالي» ءفيلمىنىڭ حالىقارالىق پرەمەراسى تالليندە وتەدى
اتى اڭىزعا اينالعان قازاق اقىنى مۇقاعالي ماقاتايەۆ ءومىرىنىڭ سوڭعى جىلدارى تۋرالى باياندايتىن «مۇقاعالي» كوركەم ءفيلمى 2021 جىلعى 12-28 قاراشادا ەستونيادا وتەتىن مەرەيلى 25ء-شى تاللين كينوفەستيۆالىنىڭ «كۇڭگىرت تۇندەر» (PÖFF) نەگىزگى كونكۋرستىق باعدارلاماسىنا ەنگىزىلدى، دەپ حابارلايدى Almaty-akshamy.kz
بۇل تۋرالى «قازاقفيلم» كينوستۋدياسىنىڭ پرەزيدەنتى اقان ساتايەۆ ءتۇسىرىلىم توبىنىڭ قاتىسۋىمەن الماتىدا وتكەن ءفيلمنىڭ تۇساۋكەسەرى كەزىندە مالىمدەدى. كينوستۋديانىڭ باسپا ءسوز قىزمەتىنىڭ مالىمەتىنشە، ءىس-شاراعا مۇقاعالي ماقاتايەۆتىڭ ۇلى مەن كەلىنى – جۇلدىز جانە باقىتكۇل ماقاتايەۆتار دا قاتىستى، ولار شىعارماشىلىق ۇجىمنىڭ اتقارعان جۇمىستارى ءۇشىن العىس ءبىلدىرىپ، اقىننىڭ 90 جىلدىعىنا وراي شىعارىلعان مەرەيتويلىق مەدالداردى تابىس ەتتى.
«ا» ساناتىنداعى «كۇڭگىرت تۇندەر» كينوفەستيۆالى 1997 جىلدان بەرى وتكىزىلىپ كەلەدى. بۇل – بالتىق جاعالاۋىنداعى ەڭ ۇلكەن فەستيۆال جانە شىعىس ەۋروپاداعى ەڭ ءىرى كينو كورسەتىلىمدەردىڭ ءبىرى. فەستيۆالدى ۇيىمداستىرۋشىلاردىڭ ايتۋىنشا، بيىل PÖFFء-تىڭ نەگىزگى كونكۋرستىق باعدارلاماسىنا بارلىعى 19 فيلم ەنگىزىلگەن. ولاردىڭ اراسىندا ءقازىردىڭ وزىندە ماراپاتتالعان فيلمدەر مەن كوپتەگەن دۇنيەجۇزىلىك جانە حالىقارالىق پرەمەرالار بار.
«ءبىز فەستيۆالدىڭ 25 جىلدىق مەرەيتويىنا تاڭدالعان فيلمدەردى ماقتان تۇتامىز، ولار تاڭ قالدىرادى ءارى وزىڭە جاڭا نارسەنى اشۋعا مۇمكىندىك بەرەدى جانە جۇرەكتىڭ تۇبىنە دەيىن بويلايدى»، – دەدى PÖFF ديرەكتورى تيينا لوكك.
ايتا كەتەرلىگى، فەستيۆالدىڭ باستى بايقاۋىندا قازاقستاندىق رەجيسسەر ءادىلحان ەرجانوۆتىڭ «ۇجىمدىق يممۋنيتەت» ءفيلمى دە باس جۇلدەگە تالاسادى. سونىمەن قاتار، «جاستار ءفيلمى» بايقاۋ باعدارلاماسىندا رەجيسسەر فارحات ءشارىپوۆتىڭ «18 كيلوگەرس» ءفيلمى بار.
21 قازاندا «مۇقاعالي» ءفيلمى جالپىۇلتتىق پروكاتقا شىقتى. اتالعان ءفيلمدى ەلىمىزدىڭ بارلىق كينوتەاترلارىنان كورۋگە بولادى.