ءولىمنىڭ سەبەپشىسى – كادىمگى ەلەكتر ساموكات.
الماتىدا 9 ايدىڭ ىشىندە ەلەكتر ساموكاتتارعا قاتىستى 277 جول-كولىك وقيعاسى بولىپ، 5 ادام قازا تاپتى، دەپ حابارلايدى Almaty-akshamy.kz
بۇل مالىمەتتى تاراتقان قالالىق پوليسيا دەپارتامەنتىنىڭ اقپاراتى بويىنشا، سوڭعى جىلدارى مەگاپوليستە موپەد، ەلەكتر ساموكات، ەلەكتر سكۋتەر سەكىلدى كولىك قۇرالدارىن جۇرگىزۋشىلەردىڭ سانى ارتقان.
مۇنداي كولىك تۇرلەرى قالادا ءجۇرۋدىڭ ىڭعايلىلىعى، جۇرگىزۋ ءۇشىن ونى تىركەۋ جانە وقۋدان ءوتۋ، رۇقسات الۋ قاجەتتىلىگىنىڭ بولماۋىنا بايلانىستى تانىمال بولدى. ايتۋ كەرەك، ەلەكتر ساموكاتتارى وتە جوعارى جىلدامدىقپەن - ساعاتىنا 80 كم-گە دەيىن جۇرە الادى. ءبىراق، زاڭدا وعان قورعانىس قۇرالدارى مەن جىلدامدىقتى شەكتەۋ شارالارى قاراستىرىلماعان.
بۇدان بۇرىن دەپۋتات نۇرتورە ءجۇسىپتىڭ مۇنداي قۇرىلعىلاردىڭ شەتتەن اكەلۋىن شەكتەۋ بويىنشا شارالار قابىلداۋ كەرەگىن ايتقانى تۋرالى حابارلاعانبىز.