ەكپە الماعاندار جۇمىستان وتەماقىسىز شەتتەتىلەدى

ق ر باس مەملەكەتتىك ەڭبەك ينسپەكتورى تولەگەن وسپانقۇلوۆ وسىلاي دەدى.

جۇمىس بەرۋشىلەر ۆاكسينا الماعانداردى جۇمىستان وتەماقىسىز شەتتەتە الادى، دەپ حابارلايدى Almaty-akshamy.kz

«ۆاكسينالاۋ - قازىرگى تاڭدا وتە وزەكتى ماسەلە بولىپ وتىر. بىزگە وتە كوپ ساۋالدار كەلىپ تۇسەدى. بۇگىنگى تاڭدا دەنساۋلىق ساقتاۋ مينيسترلىگى سانيتارلىق نورما جاريالادى. دۇيسەنبىدەن بەرى ول نورما كۇشىنە ەنگەن بولاتىن. سول نورمادا جۇمىس بەرۋشى مىندەتتى ۆاكسيناسيادان وتپەگەن ادامدى جۇمىسقا جىبەرمەۋى كەرەك ەكەنى جازىلعان. مىندەتتى ۆاكسينا الماعان ادامدار پتر تەستىدەن ءوتۋى كەرەك»، - دەپ ءتۇسىندىردى ەڭبەك ينسپەكتورى.

ماماننىڭ ايتۋىنشا، بۇل – رەسپۋبليكالىق پروبلەما.

«ەڭبەك كودەكسىنىڭ تالاپتارى بويىنشا بۇگىنگى تاڭدا جۇمىس بەرۋشىلەر رەسپۋبليكانىڭ نەمەسە ءوڭىردىڭ باس سانيتار دارىگەرىنىڭ قاۋلىسىن نەگىزگە الا وتىرىپ، ۆاكسينا الماعان جانە پتر تەستىدەن وتپەگەن جۇمىسشىلاردى ەڭبەككە ارالاستىرماۋ كەرەك. COVID-19-بەن اۋىرعان ادامدى جۇمىسقا جىبەرمەۋ كەرەكتىگى تۋرالى تىكەلەي نورما بولماعانىمەن، ەڭبەك كودەكسىنىڭ 48-بابىنىڭ 1-بولىگىندە زاڭنامالىق جانە مەملەكەتتىك ورگاندار شىعارعان اكتىلەر نەگىزىندە ەڭبەكتەن شەكتەۋگە جول بەرىلەتىنى ايتىلعان. ياعني، دەنساۋلىق تۋرالى كودەكس بويىنشا باس سانيتار دارىگەردىڭ قاۋلىسىن ورىنداۋ مىندەتتى. سوندىقتان قازىرگى تاڭدا جۇمىس بەرۋشىلەر ۆاكسينا الماعان جۇمىسشىلاردى ەڭبەكتەن شەكتەۋگە قۇقىلى. ءتىپتى جۇمىستان شەتتەتىلگەن ۋاقىتتا ايلىق تولەمەي دە شەكتەي الادى. ءبىراق ەكىجاقتى كەلىسىم بولسا، ايلىقتىڭ 50 پايىزىن نەمەسە ەڭ تومەنگى ەڭبەكاقى مولشەرىن تولەي الادى. ءبىراق ەكى جاقتىڭ دا كەلىسىمى بولعاندا عانا وسىلاي بولۋى مۇمكىن»، - دەدى تولەگەن وسپانقۇلوۆ.