«مۇقاعالي» ءفيلمى تالليندە وتكەن حالىقارالىق فەستيۆالدە جۇلدەگە يە بولدى

ناعىز رۋحاني قۇندىلىقتاردى دارىپتەۋگە باعىتتالعان كينوتۋىندى

بەلگىلى رەجيسسەر بولات قالىمبەتوۆ تۇسىرگەن «مۇقاعالي» ءفيلمى «تەمنىە نوچي» اتتى 25ء-شى تاللين كينوفەستيۆلىندە (PÖFF) ەكۋمەنيكالىق قازىلار القاسىنىڭ ارنايى جۇلدەسىنە يە بولدى، دەپ حابارلايدى Almaty-akshamy.kz «قازاقفيلم» كينوستۋدياسىنا سىلتەمە جاساپ. 

بۇل تۋرالى فەستيۆال ۇيىمداستىرۋشىلارى «ەستونيا» كونسەرت زالىندا وتكەن شارانىڭ جابىلۋ سالاتانتىندا جاريا ەتتى.

«ءفيلمنىڭ پوەزيالىق ءتىلى مەن ەرەكشە كوركەمدىگى ادام جانىن ەرەكشە سەزىمگە بولەيدى. ناعىز رۋحاني قۇندىلىقتاردى دارىپتەۋگە باعىتتالعان كينوتۋىندى»، - دەدى ەستونيانىڭ ءدىني ۇيىمدارى وكىلدەرى كىرگەن ەكۋمەنيكالىق قازىلار القاسى.

ەستەرىڭىزگە سالا كەتسەك، قازاقتىڭ اقيىق اقىنى مۇقاعالي ماقاتايەۆتىڭ 90 جىلدىعىنا وراي ق ر مادەنيەت جانە سپورت مينيسترلىگىنىڭ تاپسىرىسى بويىنشا شاكەن ايمانوۆ اتىنداعى «قازاقفيلم» اق جارىققا شىعارعان كينوتۋىندى اتى اڭىزعا اينالعان اقىن ءومىرىنىڭ سوڭعى جىلدارى تۋرالى باياندايدى. 

ءفيلمنىڭ سەنارييىن بەلگىلى جازۋشى جۇسىپبەك قورعاسبەك رەجيسسەر بولات قالىمبەتوۆ جانە عازيز ناسىروۆپەن بىرگە جازدى. اتالعان كينوتۋىندى ۇستىمىزدەگى جىلى 21 قازاندا پروكاتقا شىققان بولاتىن.